Ulttyq ulannyń eki sarbazy qaza tapty
Ulttyq ulan áskerı qyzmetshileri quqyq qorǵaý organdarynyń qyzmetkerlerimen birlesip elimizdiń jappaı bassyzdyq jáne búlik shyqqan barlyq qalalary men eldimekenderinde qaýipsizdik pen quqyqtyq tártipti qamtamasyz etýge jumyldyryldy.
Oblys ortalyqtarynda, Almaty jáne Shymkent qalalarynda qaýipsizdikti qamtamasyz etý barysynda Ulttyq ulannyń 216 áskerı qyzmetshisi buzaqylyq toppen qaqtyǵys kezinde kóptegen dene jaraqattaryn aldy. Búginde olar túrli deńgeıdegi jaraqattarmen, sonyń ishinde oq, ashyq bassúıek-mı jaraqattarymen, súıek synyqtarymen jáne basqa da dıagnozdarmen qalalyq emdeý mekemelerinde jatyr.
Oq tıgen eki kelisimshart áskerı qyzmetshisi qazir hırýrgııalyq bólimshede bolsa, qysqa merzimdi áskerı qyzmettegi sarbazdardyń beseýi aýyr halde jan saqtaý bólimine tústi. Ofıtserlerdiń kóbi túrli dárejedegi jaraqattar alǵan.
2022 jyldyń 5 qańtarynda azamattyq boryshyn óteýshi qos sarbaz: qatardaǵy Madııar Qaısarov pen Aıbat Amanov tártip buzýshylardy toqtatý boıynsha qyzmettik-jaýyngerlik mindetterin atqarý kezinde qaza tapty.
Jappaı tártipsizdik barysynda 50 áskerı tehnıka zardap shekken, onyń 8-i qaıta qalpyna keltirýge jaramsyz.
Sonymen birge, ulandyqtar el astanasynyń mańyzdy nysandary men ınfraqurylymdaryn qadaǵalaýda. 600-ge jýyq áskerı qyzmetshi Shymkent qalasynyń qaýipsizdigin qamtamasyz etýde jáne qala ákimdigi men basqa da nysandardy kúzetýde.
Budan bólek, Ulttyq ulan áskerı qyzmetshileri Aqtaý, Atyraý, Oral, Aqtóbe, Jańaózen, Pavlodar, Óskemen, Semeı, Kókshetaý, Qostanaı, Petropavl, Qaraǵandy jáne Jezqazǵan qalalarynyń tynyshtyǵyn qamtamasyz etýde.
Aıtyp óteıik, búlikshiler toby shabýyl jáne qaqtyǵystar kezinde qoldan jasalǵan túrli quraldardy, janǵysh suıyqtyqtardy, «Molotov kokteılin», temir-tersek, túrli armatýralardy, sondaı-aq tegis uńǵyly qarýdy qoldanyp jatyr.
