Ulttyq ulannyń áskerı bólimderinde jańa oqý jyly bastaldy (FOTO)
ORAL. QazAqparat - Astana kúni qarsańynda QR Ulttyq ulany «Batys» óńirlik qolbasshylyǵynyń barlyq áskerı bólimderinde jańa oqý kezeńi bastaldy.
«Batys» óńirlik qolbasshylyǵynyń baspasóz qyzmetinen túsken málimetke qaraǵanda, bıylǵy jaýyngerlik saıys Táýelsizdiktiń 25 jyldyǵyna oraı «Táýelsizdik - tuǵyrymyz, Otanǵa qyzmet - boryshymyz» uranymen ótýde. Onyń bastamashysy Oral qalasyndaǵy 5517-áskerı bólim barlyq áriptesterin ózderin belsendi qoldap, áskerdegi jaýyngerlik saıysqa qosylýǵa shaqyrdy.
Atalmysh bólimde memlekettik-quqyqtyq daıyndyq jáne jaýyngerlik ázirlik boıynsha alǵashqy sabaqtar ótkizilip, qarý-jaraq pen áskerı tehnıkany meńgerý, kúndelikti jumystardy oryndaý barysynda qaýipsizdik sharalaryn qatań saqtaý, jaýyngerlik esep toptaryn jetkizý baǵytynda keshendi dárister berildi.
Jańa oqý jylynyń bastalýyna oraı «Batys» óńirlik qolbasshysy, general-maıor Qaırat Aqtanov Ulttyq ulannyń bas qolbasshysy, general-leıtenant Rýslan Jaqsylyqovtyń tapsyrmalaryn jeke quram aldynda naqtylady. «Qazirgi tańda Ulttyq ulan áskerleri - el bostandyǵynyń, tártiptiń, barlyq qazaqstandyqtardyń tynyshtyǵy men seniminiń kepili. Ulttyq ulan quqyqtyq tártip áskeri ataǵyn abyroımen ustanyp, qoǵamdyq qaýipsizdik pen tártipti qamtamasyz etip, el azamattarynyń erkindigi men beıbit ómirin kúzetýde. Ulttyq ulan patrıotızm, azamattyq, erlik jáne adamgershilik mektebi bolyp keledi jáne solaı bola da bermek», dedi Q.Aqtanov.
«Batys» óńirlik qolbasshysynyń orynbasary, polkovnık Isataı Járdemovtiń aıtýynsha, qazirgi kezde ár áskerı qyzmetshiden úlken maqsat jolyndaǵy umtylys, jaýyngerlik daıyndyq deńgeıin jetildirýde kásibılik pen jeke oryndaýshylyq tártip talap etiledi.
Jańa oqý kezeńi barysynda áskerı qyzmetshiler aldynda jaýyngerlik daıarlyq deńgeıin arttyrý mindeti tur. Josparlanǵan sharalar kóptegen áskerı oqý-jattyǵý barysynda júzege asyrylady. 
