Ulttyq Ulannyń 60-tan astam qyzmetkerine jańa páterdiń kilti tabystaldy
ASTANA. QazAqparat - Ulttyq Ulannyń «Shyǵys» óńirligine qarasty 6699 áskerı bóliminiń Jańǵyztóbe aýylynda ornalasqan atqyshtar batalonynyń áskerı qyzmetshileri qonys toıyn toılady. Osy jyldyń naýryz aıynda bastalǵan alpys tórt páterlik tórt qabatty úıdiń qurylysy josparǵa saı jeltoqsan aıynda aıaqtalyp, áskerı qyzmetshilerge páter kiltteri tabys etildi.
Ulttyq Ulannyń baspasóz qyzmetiniń habarlaýynsha, áskerı qyzmetshilerdi qonys toıymen quttyqtap, páter kiltterin tabys etýge Parlament Májilisiniń depýtaty Nurtaı Sabılıanov, Ulttyq ulan Bas qolbasshysynyń TjÁQJ jónindegi orynbasary polkovnık Muhametqalı Satov, «Shyǵys» óńirlik qolbasshylyǵynyń qolbasshysy general-maıor Baýyrjan Ábjanov jáne jergilikti ákimdik basshylyǵy, Ulttyq Ulannyń ardagerleri, mektep muǵalimderi men oqýshylary qatysty.
Osy atqyshtar batalonynda alǵashqy ofıtserlik ómiri bastalysymen qyzmet etip júrgen aǵa leıtenant Maqsat Muqaevtyń otbasy eki bólmeli páterge ıe boldy.
- Eki balam men jubaıymnyń mereıi ústem. Endi artqa alańdamaı tek qana qajyrly da abyroıly qyzmet etýge barlyq múmkindik bar. Bul batalonnyń turǵyn úı máselesi osymen tolyq sheshildi, - deıdi batalonnyń bas tárbıeshisi Maqsat Muqaev.
Áskerı qyzmetshilerge otbasynyń músheleriniń sanyna baılanysty bir, eki jáne úsh bólmeli páterler berildi.
