Ulttyq ulannyń 100-den astam sarbazy maıdangerdiń úıiniń aldynda sherý uıymdastyrdy
ORAL. QazAqparat – Oralda Ulttyq ulan jaýyngerleri 95 jastaǵy maıdanger Alevtına Mıtrohınany merekemen quttyqtady, dep habarlaıdy QazAqparat tilshisi.
QR Ulttyq ulany «Batys» óńirlik qolbasshylyǵynan podpolkovnık Erbolat Sultanovtyń málim etkenindeı, 5517-áskerı bóliminiń 100-den astam jaýyngeri maıdanger turatyn úıdiń aldynan sherý jasap, júrip ótti.
Áskerı orkestrdiń súıemeldeýimen soǵys jylǵy ánderdi oryndap, maıdangerge qurmet kórsetti. «Alevtına Tımofeevnanyń dańqy arta bersin!» dep daýystady.
Terezesiniń aldyna kelip, quttyqtaǵan jas jaýyngerlerdi kórgen maıdanger kózine jas aldy.
Sherýden keıin «Batys» óńirlik qolbasshysy tárbıe jáne áleýmettik-quqyqtyq jumystar jónindegi orynbasary, podpolkovnık Baqyt Alazov QR Іshki ister mınıstri, polıtsııa general-leıtenanty Erlan Turǵymbaevtyń atynan maıdangerge uzaq ǵumyr, myqty densaýlyq tilep, quttyqtaý hat, syılyq pen gúl shoǵyn tabys etti.
A.Mıtrohına Ekinshi dúnıejúzilik soǵysta medbıke boldy. 17 jasynda Stalıngrad maıdanynan erlik jolyn bastaǵan ol álemniń alty elinde boldy.
«Stalıngradtaǵy alapat shaıqastar áli esimizde. Qala túgel qırap, otqa orandy, Edilde qan sý bolyp aqty. Sonda da keńes halqy jaýǵa berilgen joq. Biz Uly jeńis jolynda Otan úshin janyn bergen ár adamdy umytpaýǵa tıistimiz. Buıyrsa, Jeńistiń 75 jyldyǵyna arnalǵan sharalarǵa qatysamyz. Eń bastysy, elimiz aman, jurtymyz tynysh bolyp, keıingi jas urpaq beıbit ómir súrsin», - dedi Alevtına Mıtrohına.
«Batys» óńirlik qolbasshylyǵy ardagerler keńesiniń tóraǵasy, zapastaǵy podpolkovnık Baqytjan Berdıev 8 naýryz – Halyqaralyq áıelder kúnine oraı soǵysqa qatysqan ár maıdanger áıeldi quttyqtaıtynyn jetkizdi.
Atalmysh shara «Biz – Jeńistiń muragerlerimiz!» atty respýblıkalyq estafetasynyń aıasynda uıymdastyryldy.
Eske sala keteıik, budan buryn «Biz – Jeńistiń muragerlerimiz!» estafetasynyń Oralda jalǵasqanyn jazǵan bolatynbyz.
