Ulttyq ulanǵa jańadan qabyldanǵandar Atyraýdan Aqtaýǵa ushaqpen attandy
ATYRAÝ. QazAqparat – Ulttyq ulanǵa jańadan qabyldanǵan 40-tan astam áskerge shaqyrylǵan jas Atyraýdan Aqtaýǵa ushaqpen attandy, dep habarlaıdy QazAqparat tilshisi.
«Batys» óńirlik qolbasshylyǵynyń baspasóz qyzmeti málim etkenindeı, koronavırýs indetine baılanysty shekteý sharalary jaǵdaıynda jastardy Ulttyq ulannyń vedomstvolyq ushaǵymen jetkizý uıǵaryldy.
Olardyń basym kópshiligi Ulttyq ulan qatarynda qyzmet etkisi kelgen eken, osylaısha armandary oryndalyp otyr.
Áskerge shaqyrylýshylardyń árqaısysy testiden ótip, synama koronavırýs joqtyǵyn kórsetken. Olarǵa maska, qolǵap, antıseptıkter berildi.
Jańadan qabyldanǵandar barmas buryn Atyraýdaǵy jınaq pýnkti jáne olardy tasymaldaǵan qyzmettik kólik arnaıy óńdeýden ótkizildi. Sondaı-aq áskerı kıim beretin oryn, medıtsına kabınetteri, ýaqytsha turǵan jer, qyzmettik bólmelerde dezınfektsııa jumystary júrgizildi.
Sapqa turǵan kezde de araqashyqtyq saqtaldy. Aqtaýdaǵy 6656-áskerı bólimine jetkennen keıin jańa kelgen jastar eki apta boıy karantınde bolady.
«Árıne, tolqyp turmyn. Balam úıden alysta qyzmet etetin bolady. Degenmen ol áskerı boryshyn abyroımen ótep, úıge aman-esen oralady dep senemin», deıdi kishi uly Erasyldy áskerge attandyrǵan Janna Qısmetova.
-Bul – ár adamnyń boryshy. Sondyqtan Ulttyq ulanǵa qyzmet etýge usynys jasalǵan kezde berik senimmen kelistim. Bir jyldan keıin de kelisimshartpen qyzmet atqara bergim keledi. Óıtkeni áskerı qyzmetker bolýǵa tolyq jaǵdaı jasalǵan. «Áskerı ónim» memlekettik baǵdarlamasyna sáıkes úı alýǵa bolady, medıtsınalyq saqtandyrý da tegin, - dedi Erasyl Jumabek