Ulttyq ulan jaýyngerleri jol boıynda talyp qalǵan azamatty aman alyp qaldy
AQTÓBE. QazAqparat - Ulttyq ulan jaýyngerleri jol boıynda talyp qalǵan azamatty aman alyp qaldy, dep habarlaıdy QazAqparat tilshisi.
«Batys» óńirlik qolbasshylyǵynyń baspasóz qyzmetinen túsken málimetke qaraǵanda, oqıǵa keshe «Aqjar-2» trassasy boıynda oryn aldy.
Aqtóbedegi Ulttyq ulanǵa qarasty 6655 áskerı bóliminiń atý alańynan qaıtyp kele jatqan atalǵan bólimniń medıtsına qyzmetiniń bastyǵy, aǵa leıtenant Nurkeldi Baqtybaev pen vzvod komandıri, aǵa leıtenant Nurǵalı Seıdembaev jol boıynda patrýl avtokólikteri toqtap, halyq jınalyp qalǵanyn kóredi. Medıtsına qyzmetiniń bastyǵy dereý avtokólikti toqtatyp, oqıǵa ornyna barǵan kezde er adamnyń talma aýrýy ustap, esinen tanyp jatqan bolatyn. Ol medıtsına qobdıshasyn alyp, alǵashqy medıtsınalyq járdem kórsetip, qan qysymyn ólshegennen keıin er adamdy qalalyq aýrýhanaǵa jetkizedi.
Qyzyljar kentiniń turǵyny, tórt balanyń ákesi, 39 jastaǵy Qurmanbek Qalmyrzaev jany qysylǵan kezde qolushyn sozǵan Ulttyq ulan jaýyngerlerine rızashylyǵyn bildirdi.
Qurmanbektiń zaıyby Málıka Dabylovanyń aıtýynsha, sol kúni tańnan beri joldasy alty márte talyp qalǵan. Emshige apara jatqan kezde jolda qaıtadan sondaı kúıge túsken. Ol da osyndaı qysyltaıań kezde járdemin bergen jigitterge alǵysyn aıtyp, qazirgi kezde Qurmanbektiń aýrýhanada emdelip jatqandyǵyn jetkizdi.
