Ulttyq ulan jaýyngerleri joǵalǵan jeti jasar balany tapty
ORAL. QazAqparat - QR Ulttyq ulany 5517-áskerı bóliminiń jaýyngerleri Oralda adasyp ketken jeti jasar balany taýyp, ata-anasymen qaýyshtyrdy, dep habarlaıdy «QazAqparat» tilshisi.
«Batys» óńirlik qolbasshylyǵynyń baspasóz qyzmetinen túsken málimetke qaraǵanda, 10 tamyz kúni Ábilqaıyr han kóshesimen jalǵyz júrgen jeti jasar Ermekti quramynda leıtenant Qazbek Tańsyqov, qatardaǵy jaýyngerler Álisher Jaqasov pen Vıktor Shkokk bar top baıqap, ony úıinen oınaýǵa shyǵyp, adasyp ketkenin bilgen. Olar balany úıine aparyp, ata-anasynyń qolyna tapsyrǵan. Bul kezde ata-anasy ulynyń joǵalyp ketkeni týraly polıtsııaǵa habar berip te qoıǵan.
Adasqan balanyń ákesi Nurjan Mámbetov QR Ulttyq ulany «Batys» óńirlik qolbasshysy, general-maıor Álibek Serálıevtiń atyna hat jazyp, áskerı qyzmetkerlerge alǵysyn bildirgen. Qyraǵylyq kórsetkeni úshin Ulttyq ulan jaýyngerleri yntalandyrýǵa usynyldy. Olardyń mundaı úlgili is-áreketi N.Mámbetovtiń hatynan keıin ǵana belgili bolǵan, ózderi muny qyzmettik boryshy sanap, eshkimge aıtpaǵan.
