Ulttyq ulan jaýyngerleri jas qyzdy zorlamaq bolǵandardan qutqaryp qaldy
TALDYQORǴAN. QazAqparat - Ulttyq ulannyń 5571 áskerı bóliminiń jaýyngerleri jas qyzdy zorlamaqqa árekettengenderden qutqaryp qaldy. Oqıǵa Almaty oblysynyń Uıǵyr aýdanynda bolǵan, dep habarlaıdy QazAqparat tilshisi.
«14 sáýir kúni keshki saǵat ondar shamasynda «Aıbalta» strategııalyq komandalyq-shtabtyq oqý-jattyǵýyna tigilgen dalalyq lagerdi kúzetý jáne qorǵaý boıynsha patrýlde júrgen kishi serjant Ramıl Shormakov jáne starshına Aıbek Mýhamedı janushyra kómekke shaqyrǵan áıel adamnyń daýsyn estıdi. Muny birden lager boıynsha kezekshi aǵa leıtenant Nursultan Qýandyqqa baıandap, jedel kómekke umtylady. Oqıǵa ornyna jyldam jetken patrýlge azamatsha Q. ózin beıtanys eki adamnyń zorlamaq nıette bolǵandyǵyn, kómekke kele jatqan adamdardy baıqap, qashyp ketkendigin aıtty» - dedi QR Ulttyq ulany «Ońtústik» óńirlik qolbasshylyǵynyń baspasóz qyzmetiniń hatshysy, maıor Danara Baımaǵanbetova.
Vedomstvo ókiliniń málimetinshe, ulandyq áskerıler bolǵan jaıtty 102 nómirine birden habarlaǵan. Artynsha oqıǵa ornyna Shonjy aýdandyq polıtsııa basqarmasynan jedel tergeý toby kelip, eki kúdiktini qolǵa túsirgen.
«Birlesken is-qımyldardyń nátıjesinde 1985 jylǵy A. jáne 1974 jylǵy V. degen eki azamat kúdikti retinde ustaldy. Qylmystyq is qozǵaldy. Ulandyqtardyń qyraǵylyǵy men jyldam áreket etýiniń nátıjesinde Almaty oblysynyń turǵyny, órimdeı jas qyz buzaqylardyń aram oıynyń qurbany bolýdan aman qaldy. Azamatsha Q. dalalyq lagerden jetken óziniń qutqarýshylaryna alǵysyn jaýdyrdy», - dep tolyqtyrdy D. Baımaǵanbetova.
Aıta keteıik, qyz balany qanypezerlerden qutqaryp qalǵan áskerıler Uıǵyr aýdanyndaǵy «Qaljat» eldi mekeniniń mańaıyna komandalyq- shtabtyq oqýyǵa barǵan. Ol jerde Qazaqstan áskerleriniń birikken «Aıbalta» strategııalyq komandalyq-shtabtyq basqosýy uıymdastyrylǵan.
