Ulttyq ulan jaýyngerleri Jańaózende joǵalǵan balany tapty
ORAL. QazAqparat - QR Ulttyq ulany «Batys» óńirlik qolbasshylyǵyna qarasty 5548-áskerı bólim jaýyngerleri Jańaózen qalasynda joǵalǵan bes jasar balany tapty, dep habarlaıdy «QazAqparat» tilshisi.
«Batys» óńirlik qolbasshylyǵynyń baspasóz qyzmetinen túsken málimetke qaraǵanda, oqıǵa 18 sáýir kúni 19 saǵat 40 mınýt shamasynda oryn alǵan. «Shuǵyla» shaǵynaýdanynda óz úıiniń aýlasynda oınap júrgen balanyń joǵalyp ketkeni jóninde áskerı toptar boıynsha kezekshi, aǵa leıtenant Azamat Jaqasovqa ratsııa arqyly habar túsken. Sol boıda barlyq áskerı toptar qalanyń shaǵynaýdandarynda izdeý jumystaryna kirisken. 20 saǵat 30 mınýt shamasynda quramynda serjant Nurjan Temirbekov, qatardaǵy jaýyngerler Baqytjan Turabekov pen Oral Qarataı bar top «Shuǵyla» shaǵynaýdanyndaǵy úılerdiń biriniń aýlasynda jylap otyrǵan balany kórgen. Kelip, surastyrǵanda, sol joǵalǵan bala bolyp shyqty. Ulttyq ulan jaýyngerleri balany taıaý mańdaǵy polıtsııa tirek pýnktinde anasynyń qolyna tapsyrdy. Sheksiz qýanyshqa bólengen anasy jaýyngerlerge alǵysyn jaýdyrdy.
Qyraǵylyǵy men óz mindetterin minsiz oryndaǵany úshin atalǵan jaýyngerler yntalandyrýǵa usynyldy.
