Ulttyq ulan jaýyngerleri Jańaózende adasqan aqsaqal men balany tapty
AQTAÝ. QazAqparat - Ulttyq ulan jaýyngerleri Jańaózen qalasynda adasqan aqsaqal men balany tapty, dep habarlaıdy QazAqparat tilshisi.
QR Ulttyq ulany «Batys» óńirlik qolbasshylyǵynyń baspasóz qyzmetinen túsken málimetke qaraǵanda, oqıǵa 23 jeltoqsan kúni oryn aldy.
Kúndiz 80 jasar aqsaqal Araı kóshesindegi úıinen shyǵyp ketedi. Otbasy músheleri ózdigimen izdegenimen, taba almaǵannan keıin polıtsııaǵa habarlaıdy.
Іzdestirý sharalary barysynda quramynda leıtenant Saıat Kenjeǵulov, qatardaǵy jaýyngerler Álibek Sarybaev, Qydyr Shernııaz avtokúzet toby saǵat 18.20 shamasynda 5-shaǵynaýdanda jol shetinde jeńil aıaqkıimmen, kúrtesiz, jan-jaǵyna alańdap turǵan qarııany baıqaıdy. Aqsaqaldyń ara-tura esin joǵaltyp alatyny bar eken. Sol sebepten týma-týysqandaryna óziniń qaıda ekenin jetkize almaǵan.
Birneshe saǵattan keıin jaýyngerler qalanyń taǵy bir aýdanynan joǵalǵan 4 jasar balany tapty.
Keshki saǵat 21.00 shamasynda 3-shaǵynaýdanda balanyń joǵalǵany jóninde habar túsip, jaqyn mańdaǵy jaýyngerler soǵan jumyldyrylǵan. Balany jarty saǵattan keıin quramynda qatardaǵy jaýyngerler Erbol Amanǵalıuly, sondaı-aq Sanjar Jeńisbaı, Aqdáýlet Sapý bar top bir úıdiń jertólesinen tapty. Keıin Ábilqaıyr esimdi balanyń úıinen oınaýǵa shyǵyp, adasyp ketkeni belgili boldy. Kóp uzamaı ol da týma-týysqandarymen aman-esen qaýyshty.
Qyraǵylyq kórsetkeni úshin atalǵan jaýyngerler 5548-áskerı bólim komandırimen yntalandyryldy.
Eske sala keteıik, budan buryn Ulttyq ulan jaýyngerleriniń Oralda sýyq qarýmen júrgen er adamdy ustaǵanyn, sondaı-aq tártip saqshylarynyń bes jasar balany qutqaryp qalǵanyn jazǵan bolatynbyz.
