Ulttyq ulan jaýyngerleri bir jylda 22 joǵalǵan balany taýyp, ata-anasyna qaıtarǵan
NUR-SULTAN. QazAqparat - Ótken jyly Ulttyq ulan jaýyngerleri 22 joǵalǵan balany ata-analaryna taýyp berdi, dep habarlaıdy QazAqparat.
Kún saıyn Ulttyq ulannyń jedel maqsattaǵy áskerı bólimderi Іshki ister organdarymen birlesip, eldiń barlyq qalalarynda qoǵamdyq tártipti qamtamasyz etedi. Patrýldeý baǵytyna bes myńnan astam áskerı qyzmetshi túsedi.
Olar jaýyngerlik qyzmet kezeńinde tonaý, urlaý jáne qaraqshylyq faktilerin ashady, izdeýdegi adamdardy ustaıdy.
Sarbazdar men ofıtserler uıaly telefondardy, noýtbýkterdi, aqsha men esirtkini tabady. Sondaı-aq, áskerı qyzmetshiler azamattarǵa balalary men basqa týystaryn tabýǵa kómektesedi.
Sonymen, 2021 jyly Ulttyq ulannyń áskerı qyzmetshileri 22 joǵalǵan balany taýyp, jaqyndaryna qaıtardy.
«Ońtústik» óńirlik qolbasshylyǵynyń áskerı bólimderi - 4 joǵalǵan balany, «Shyǵys» - 2 balany, «Ortalyq» - 3 balany, «Batys» - 3 balany taýypty.
Joǵalǵan balalardyń kópshiligin elordalyq jedel quramasy – 5573 áskerı bóliminiń áskerı qyzmetshileri taýypty. 10 bala aman-esen ata anasyna qaıtarylǵan.
Mysaly, ótken jylǵy sońǵy oqıǵany alaıyq. 6 qazanda saǵat 18.45 shamasynda patrýldik toptyń bastyǵy kishi serjant Azamat Kárimov pen patrýlshi qatardaǵy jaýynger Suńǵat Júkenov marshrýttardy tekserýge shyǵady.
Qonaev-Dostyq kósheleriniń qıylysyndaǵy baǵdarshamǵa kelip, olar mektep oqýshysyn kóredi. Oqýshy «Báıterek» monýmentiniń janynda eresekterdiń qaraýynsyz jalǵyz júrgen.
Ol qatty qobaljýly boldy. Sondyqtan ulandyqtar onyń turatyn jerin anyqtaı almady. Osydan keıin áskerı jasaq ony jaqynda ornalasqan týrıstik polıtsııa beketine aparady.
Keıin belgili bolǵandaı, segiz jasar oqýshynyń ata-anasy ony saǵat 16.00-den bastap áleýmettik jeliler arqyly izdegen.
Ol birinshi synypta oqıdy. Sol kúni oqýshy aǵasyn mektep janynda kútpeı, erterek ketip qalypty.
Oqıǵa ornyna kelgen anasy men ákesi Ulttyq ulannyń áskerı qyzmetshilerine alǵysyn aıtty.
Dál sol kúni keshkisin Qoshqarbaev kóshesiniń boıynda quramynda qatardaǵy jaýynger Murat Qarjaýov pen patrýldik Alpamys Nábı men Sarjan Qylyshbaı bar áskerı jasaq 10 jasar qyzdy baıqap qalady.
Jetkinshektiń jalǵyz júrgeni jáne qosymsha sabaqtan oralǵannan keıin joldan adasyp ketkeni belgili bolady.
Tártip saqshylary ákesiniń telefon nomerin surap habarlasady. Ózderi turǵan jerin aıtady.
Biraz ýaqyttan keıin azamat aıtylǵan mekenjaıǵa kelip, áskerı qyzmetshilerge, sondaı-aq Ulttyq ulannyń 5573 áskerı bóliminiń qolbasshylyǵyna rızashylyǵyn bildirdi.
- Kóbine balalar jazǵy ýaqytta jıi joǵalady. Qalalyq saıabaqtarda, jappaı mereke oryndarynda belsendi otbasylyq demalys kezinde bolady. Balalar alańda qalyp qalady, keıde júgirip ketedi. Ata-analar balasyn óz betinshe taba almaıtyn jaǵdaılar kóp boldy. Áskerı jasaq árqashan jalǵyz júrgen balalarǵa nazar aýdarady. Ulandyq jaýyngerler olarmen amandasady, sóılesedi, kimmen júrgenin suraıdy. Balalar áskerı formadaǵy adamdarǵa senedi. Sondyqtan olar joǵalyp ketkenin jáne úıge jol taba almaı júrgenin jasyrmaı aıtady. Nátıjesinde biz dereý shara qoldanyp, balalardy jaqyndaryna qaıtaramyz «, - deıdi Ulttyq ulan jaýyngerlik qyzmet bas basqarmasynyń aǵa ofıtseri Ermek Turǵynov.
