Ulttyq ulan týǵan anasyn tanymaı qalǵan sarbazdyń jaǵdaıy týraly málimet berdi
Telearnalar men saıttarda Ulttyq ulanǵa qarasty №5573 áskerı bólimge qatardaǵy jaýynger retinde alynǵan sarbazdyń arada apta ótpeı jatyp týǵan anasyn tanymaı qalǵany týraly málimet tarap jatyr. Ulttyq ulannyń baspasóz qyzmetine habarlasqanymyzda, oqıǵa bolǵan áskerı bólimniń baspasóz qyzmeti taratqan aqparatty usyndy.
«2022 jyldyń jeltoqsan aıynda Qostanaı oblysy boıynsha Qorǵanys isteri jónindegi departamenti shaqyrǵan merzimdi qyzmettiń áskerı qyzmetshisi qatardaǵy jaýynger Ámirbekov Ernar Baltabekuly 2023 jyly 22 qańtarda saǵat 20.50 shamasynda tamaqtanǵan soń, rotanyń ornalasqan jerine bara jatqan kezinde esinen tanyp qalady. Birge kele jatqan qarýlastary oǵan dereý alǵashqy medıtsınalyq kómek kórsetip, kezekshi feldsher men áskerı bólim lazaretiniń dárigerin habardar etedi. Sarbazdy teksergennen keıin kezekshi dáriger jedel medıtsınalyq járdem brıgadasyn shaqyryp, qatardaǵy jaýynger E.B. Ámirbekov 2-shi qalalyq aýrýhanaǵa jatqyzylady. Áskerı bólimniń basshylyǵy osy fakti boıynsha mán-jaılardy anyqtaý úshin qyzmettik tekserý júrgizýde jáne qadaǵalaý organdaryn habardar etti», - dep jazylǵan resmı málimette.
QazAqparat tilshisi sarbazdyń anasyna habarlasyp, ekinshi taraptyń pikirin bildi.
«Balamdy qazir tekserip jatyr. Ázirge aıtqysy kelgenin qaǵazǵa ǵana jazyp berip jatyr. Esinde eshteńe qalmaǵanyn jazdy. Biraq resmı málimettegi ózdiginen talyp qaldy degenge senbeımin. Ondaı bolǵannyń ózinde esinen aıyrylmaýy kerek edi. Denesinen uryp-soǵý belgilerin tappadyq. Biraq bul jaǵdaıǵa ózdiginen túskenine de senbeımin. Qazir meni onyń amandyǵy ǵana alańdatyp tur. Myna jerden medıtsınalyq tekserýden tolyq ótip alsyn, keıin ózim táýelsiz medıtsınalyq saraptama jasataıyn dep otyrmyn», - deıdi Dına Júsipova.
