Ulttyq ulan sarbazyna kúsh qoldanǵan adam 4 jylǵa sottaldy

NUR-SULTAN. QazAqparat – Qańtar oqıǵasy kezinde Ulttyq ulan men polıtsııaǵa kúsh qoldanǵandar sottaldy. Bul týraly QR Іshki ister mınıstrligi Tergeý departamentiniń basshysy Sanjar Ádilov aıtty, dep habarlaıdy QazAqparat tilshisi.

«Jurtshylyqqa tek resmı derekkózderden ǵana emes, sondaı-aq áleýmettik jelilerdegi kóptegen beınejazbalardan jappaı tártipsizdik kezinde quqyq qorǵaý organdarynyń qyzmetkerlerine qatysty qatygez túrdegi zorlyq-zombylyq faktileri belgili. Olardyń kópshiligi óz mindetterin oryndap júrgen qyzmetkerdiń ómirine qaýip tóndirý retinde baǵalanady. Mundaı áreketter úshin qatań qylmystyq jaýapkershilik kózdelgen», - dedi Sanjar Ádilov Ortalyq kommýnıkatsııalar qyzmetinde.

Onyń aıtýynsha, 5 qańtarda Semeı qalasyndaǵy tártipsizdikter kezinde osy qalanyń turǵyny zańsyz áreketterdi toqtatý týraly zańdy talapqa baǵynbaı, qoǵamdyq tártipti qamtamasyz etýge qatysqan Ulttyq ulannyń áskerı qyzmetshisine dene jaraqatyn salǵan. Sot úkimimen ol kináli dep tanylyp, 4 jylǵa bas bostandyǵynan aıyryldy.

«3 qańtarda Óskemen qalasynda polıtsııa qyzmetkerleriniń zańsyz mıtıng uıymdastyrý áreketteriniń jolyn kesý kezinde osy qalanyń turǵyny olarǵa qarsylyq kórsetip, kúsh qoldanǵan. Óskemen sotynyń úkimimen ol kináli dep tanylyp, 3 jylǵa bas bostandyǵynan aıyryldy», - dedi S. Ádilov.

«Jappaı tártipsizdik kezinde qyzmetkerlerge qatysty kúsh qoldaný faktileri boıynsha birqatar qylmystyq is áli de qaralyp jatyr. Olar jaqyn arada sotqa jiberiletin bolady», - dedi vedomstvo ókili.

Budan buryn habarlanǵandaı, Jambyl obylysynda urlanǵan qarý jasyrynǵan qoımalar anyqtaldy.