Ulttyq ulan sarbazdary Jańaózende joǵalyp ketken 8 jasar qyzdy taýyp berdi

ASTANA. QazAqparat - Jańaózen qalasynda joǵalyp ketken 8 jasar qyz bala aman-esen tabyldy, dep habarlaıdy QazAqparat tilshisi QR Ulttyq ulan «Batys» óńirlik qolbasshylyǵynyń baspasóz qyzmetine silteme jasap.

«Oqıǵa 28 aqpan kúni saǵat 20.00 ýaqytynda tirkeldi. Jańaózen qalasynda keshke taman kámelet jasyna tolmaǵan qyz balanyń joǵalyp ketkeni týraly shaǵym túsken. Osylaısha, bul jaıynda Ulttyq ulannyń barlyq áskerı jasaǵyna habar taratylǵan», - delingen habarlamada.

Ulttyq gvardııa jaýyngerleri osydan keıin birden jedel izdestirý jumystaryn bastap ketti. Arada 20 mınýt óter-ótpesten patrýl bastyǵy - kishi serjant Nurbol Balyqbaı, qatardaǵy jaýyngerler Janatbek Serǵazıev pen Almat Ámirbek «Bank Tsentr Kredıt» ǵımaratynyń mańynda jylap júrgen qyz balany kóredi. Sarbazdar osydan keıin ony jubatyp, tártip saqshylaryna tapsyrǵan.

«Ulttyq ulan jaýyngerleri balany polıtsııa bólimine aparǵan. Qyzdyń ata-anasy sonda kelip, balany alyp ketti. Kómek kórsetkeni úshin rıza bolǵan ata-ana Ulttyq ulan jaýyngerlerine alǵys aıtty. Qoıylǵan mindetti oryndaýda jáne qoǵamdyq tártipti saqtaýda qyraǵylyq tanytqany úshin 5548 áskerı bóliminiń komandıri jaýyngerlerdi marapattaý týraly sheshim shyǵardy», - delingen habarlamada.

Aıta keterligi, 2018 jyldyń 23 jeltoqsanynda da ulandyqtar Jańaózende joǵalyp ketken qart adam men tórt jasar balany tapqan bolatyn.