Ulttyq ulan sarbazdary órtengen páterden eki adamdy qutqardy
NUR-SULTAN. QazAqparat – Temirtaý qalasynda Ulttyq ulan sarbazdary ys tıip, denesin kúıik shalǵan eki adamdy ajaldan aman alyp qaldy, dep habarlaıdy QazAqparat tilshisi.
Temirtaý qalasyndaǵy 5516 áskerı bóliminiń áskerı qyzmetkerleri qoǵamdyq tártipti saqtaý mindetin atqarý kezinde órt shyqqan páterdi kórip qalyp, birden sol jaqqa júgirgen.
«Bolǵan oqıǵany leıtenant Baqytjan Baıkenovke habarlaǵan Ulttyq ulan sarbazdary jol ortada órt sóndirýshilerdi de shaqyryp úlgerdi. Ekinshi qabattaǵy úıdiń esiginen tútin shyǵyp jatqan bolatyn. Podezdiń domofony arqyly habarlasqan kezde úıdi eshkim ashpaǵan. Osydan keıin sarbazdar úıdiń terezesin buzyp kirdi. Páter ishinde ys tıip, kúıik shalǵan eki adamnyń talyp jatqany anyqtaldy. Sarbazdar olardy birden syrtqa alyp shyǵyp, alǵashqy medıtsınalyq kómekti kórsetti», - dep habarlaıdy Ulttyq ulannyń baspasóz qyzmetinen.
Osydan keıin sarbazdar úıdiń basqa da turǵyndaryn syrtqy shyǵaryp, qaýiptiń betin qaıtarǵan. Áskerı jasaqtyń bastyǵy Meıirjan Bolatuly basqa da turǵyndarmen birge órtti sóndire bastaǵan. Odan bólek sarbazdar órt shyqqan úıden gaz ballonyn alyp shyqqan. Artynsha jetken órt sóndirýshiler tilsiz jaýdy aýyzdyqtady. Batyldyq tanytyp, adamdardy qutqaryp qalǵany úshin áskerı qyzmetkerler marapatqa usynylyp otyr.
