Ulttyq ulan sarbazdary Nur-Sultanda esirtki jasyrǵan adamdy ustady

NUR-SULTAN. QazAqparat – Ulttyq ulan sarbazdary birneshe uıaly telefondy taýyp, ıelerine qaıtarǵan. Sonymen qatar Nur-Sultanda esirtki túıinshektegen azamatty ustaǵan, dep habarlaıdy QazAqparat QR Ulttyq ulannyń baspasóz qyzmetine silteme jasap.

Jaqynda Almaty aýdanyndaǵy Sulýtóbe kóshesinde qyzmette júrgen sarbazdar bir azamattyń baǵananyń janynda birnárse jasyryp turǵanyn baıqap qalǵan.

Áskerı jasaqtyń bastyǵy qatardaǵy Vıktor Saharov, qatardaǵy patrýlshiler Sedet Raýshanbekov pen Jeńisbek Samarǵalıev birden azamatqa qaraı júrgen.

Onyń baǵanalardyń arasynda belgisiz zat oralǵan túıinshekti jasyrǵany anyqtaldy.

Ustalǵan azamat ári qaraı mán-jaıdy anyqtaý úshin polıtsııa qyzmetkerlerine tapsyryldy.

Saǵat 19:00 shamasynda Esenberlın kóshesiniń boıynda áskerı jasaqtyń bastyǵy qatardaǵy Dıerbek Rýstamov, qatardaǵy patrýlshiler Almat Ábenov pen Nurmet Qudratýllaev «IPhone 11» markaly uıaly telefonyn, sonymen qatar kámelet jasyna tolmaǵan stýdentke tıesili QazGZÝ kolledjiniń stýdenttik kartasyn tapqan.

Olar bul týraly áskerı jasaq boıynsha kezekshi maıor Berik Oljanovqa habarlaǵan.

Ofıtser jaqyn jerdegi kolledj ǵımaratyna jol tartady.

Shamaly ýaqyttan keıin stýdenttiń kýratorynyń nómiri tabylyp, ol stýdenttiń kýrstasymen baılanysqa shyǵady. Osylaısha, 10 mınýttyń ishinde telefon stýdentke qaıtarylady.

Aıta ketý kerek, kýratorǵa habarlasqanǵa deıin stýdent telefonyn joǵalyp alǵanyn baıqamaǵan.

Bir saǵattan keıin saǵat 20:00-de Saryarqa dańǵylynyń boıynda áskerı jasaqtyń bastyǵy qatardaǵy Rústem Sarapbaev, qatardaǵy patrýlshiler Álisher Ramazanov pen Aleksandr Voıtıýk «IPone 11» markaly telefonyn taýyp alady.

Telefonnyń ıesi oqıǵa ornyna kelip, 5573-shi áskerı bólim qolbasshylyǵyna alǵysyn bildirdi.