Ulttyq ulan sarbazdary kúreń beret kııý úshin synaqtan ótedi
ASTANA. QazAqparat - Qazan aıynyń sońǵy eki kúni Ulttyq ulan jasaǵynyń sarbazdary úshin jaýapty kún. Olar kúreń beret pen kúreń keýdeshe kııý úshin jáne «Búrkit» keýde belgisin taǵýǵa qol jetkizý úshin arnaıy synaq tapsyrady. Aıtýly shara Almaty oblysy Zarechnyı kentinde ornalasqan Qazaqstan Respýblıkasy Ulttyq ulanynyń bazasynda ótedi dep josparlanýda.
Áskerı qyzmetshiler arasyndaǵy qaısarlyq pen ójettilikti, shydamdylyq pen tózimdilikti synǵa salar aıtýly sharaǵa Reseı Federatsııasynyń atalǵandaı kúsh-qýat bólimshesiniń ókilderi de tájirıbe almasý maqsatynda qatysýdy uıǵaryp otyr. Sondaı-aq, saıypqyrandar dodasyna sheteldik áskerı Attasheler, elimizdegi arnaıy bólimshelerdiń, kúsh-qurylymdarynyń, memlekettik organdardyń, sondaı-aq buqaralyq aqparat quraldarynyń ókilderi shaqyrylǵan.
Búgingi tańda keń baıtaq elimizdiń barlyq óńirinde kúrdeli barlaý-jaýyngerlik operatsııalardy oryndaýǵa mindettelgen arnaıy maqsattaǵy «Búrkit» jasaqtary qurylǵan. Olar Ulttyq ulannyń aldyńǵy shepte júrer aldaspan jasaǵy, ásker elıtasy bolyp tabylady. Bul kúnde atalǵan qurylymdyq bólimsheler ózderine júktelgen mindetterdi tabysty oryndap, el senimin abyroıly aqtap keledi.
Ulttyq ulannyń arnaıy maqsattaǵy «Búrkit» bólimshesiniń basty maqsaty - ekstremızm jáne lańkestikpen kúresý, memleket múddesine jáne adamdardyń ómiri men densaýlyǵyna tónetin qaýip-qaterlerge qarsy jedel áreket etý bolyp tabylady.
Bir aıtarlyǵy, atalǵan jasaq quramyna kadrlardy irikteý óte tyńǵylyqty turǵyda, arnaıy oqý baǵdarlamalary boıynsha júrgiziledi. Qyzmetke úmitkerler arasynda dene shynyqtyrý, minez-qulqynyń ustamdylyǵy, sondaı-aq jaýyngerlik daıyndyqtyń joǵarǵy talaptaryna jiti mán beriledi.
Jyl saıyn «Búrkit» arnaıy maqsattaǵy bólimshesi áskerı qyzmetshileriniń arasynda bólimshe jaýyngeri úshin asa mártebeli de qurmetti sanalatyn kúreń beret pen «Búrkit» keýde belgisin taǵý quqyǵyn ıelenýge arnalǵan saıys synaǵy uıymdastyrylady. Kil myqtylar synǵa túsetin bul sharalar ár jyly ár mezgilde, sondaı-aq jer bederiniń ár túrli aımaǵynda uıymdastyrylyp keledi. Synaqtardyń mundaǵy basty talaby - Otan úshin oqqa keýde kerer atalǵan bólimshe qyzmetkerleriniń jaýyngerlik daıyndyǵyn barynsha shyńdaý, mindettelgen tapsyrmalardy atqarýǵa qajetti arnaıy bilim men ádis-tásilderdi pysyqtaý bolyp tabylady.
Dástúrli sharaǵa aınalǵan atalǵan kvalıfıkatsııalyq synaq bıyl 15-shi márte ótkizilip otyr. Osy jyly oǵan qatysýǵa 90 áskerı qyzmetshi ynta tanytqan. Áskerı qyzmetshiler synaqqa qatysý úshin teorııalyq bilimnen test tapsyryp, dene shynyqtyrý daıyndyqtary men arnaıy jattyǵýlardy, baılanys jáne medıtsına quraldaryn meńgerýden aldyn ala biliktilikteri pysyqtalady.
Atap aıtarlyǵy, synaqqa túsken áskerı qyzmetshiler bas-aıaǵy 75 shaqyrymdy 30 saǵat kóleminde júgirip ótip, 16 normatıvti oryndaıtyn bolady.
