Ulttyq ulan sarbazdary kásibı merekesin atap ótti
NUR-SULTAN. QazAqparat - Ulttyq ulannyń jeke quramy kásibı mereke – quqyqtyq tártip áskeriniń qurylǵan kúnin atap ótti, dep habarlaıdy QazAqparat vedomstvonyń baspasóz qyzmetine silteme jasap.
Aıta keteıik, osydan 28 jyl buryn 1992 jyldyń 10 qańtarynda Qazaqstan Respýblıkasy ІІM Іshki áskerleri quryldy, al 2014 jyldyń 21 sáýirinde olar Ulttyq ulan bolyp qaıta quryldy. 2015 jyldyń 10 qańtarynda «QR Ulttyq ulany týraly» Zańǵa qol qoıyldy.
Osy dataǵa oraı Bas qolbasshylyqta ótken saltanatty sharada general-leıtenant Rýslan Jaqsylyqov ardagerler men áskerı qyzmetshilerdi áskerdiń 28 jyldyǵymen quttyqtady. Shara barysynda jaýyngerlik mindetin adal oryndap, úlgili qyzmetimen erekshelengen birqatar áskerı qyzmetshi ІІM jáne Bas qolbasshy buıryǵymen marapattaldy.
Sondaı-aq, quqyqtyq tártip áskeriniń tól merekesine oraı «Qazaqstan» ortalyq kontsert zalynda Ulttyq ulan Án-bı Ansambiliniń Gala-kontsertin uıymdastyrý dástúrge aınaldy.
Búgingi tańda ansambl mýzykanttary men solısteriniń oryndaýyndaǵy áskerı – patrıottyq ánder elimizdegi barlyq mańyzdy sharalardyń kelbeti bola bildi. Áskerı taqyrypqa baılanysty birde-bir kontsert ulandyq ónerpazdardyń qatysýynsyz ótpeıdi. Ulttyq ulan án-bı Ansambli memleketimizdiń ortalyq zaldarynda Gala-kontsert beretin biregeı áskerı-mýzykalyq ujym.
Bıyl mýzykanttar: «Máńgilik el – muratymyz!» uranymen osymen on ekinshi ret jandy daýystarymen óz kórermenderin qýantty.
Aıtyp ótý kerek, búgin ulandyqtar óz ónerimen elimizdegi mańyzdy ári mereıtoılyq datalardy atap ótýdi bastady. Altyn ordanyń 750 jyldyǵy, fılosof-ǵalym, Shyǵys ǵulamasy Ál-Farabıdiń 1150 jyldyǵy, qazaqtyń uly aqyny Abaı Qunanbaevtyń 175 jyldyǵy, Uly Otan soǵysyndaǵy Uly Jeńistiń - 75 jyldyǵy, Qazaqstan Respýblıkasy Konstıtýtsııasynyń 25 jyldyǵy ispetti el tarıhyndaǵy mańyzdy datalardy ózderiniń kórkem qoıylymdarynda kórermenderge pash etti.
Kontserttik baǵdarlamada elimizdiń eńbek sińirgen qaıratkerleri men qazaqstandyq estrada juldyzdary, halyqaralyq baıqaý laýreattary: Edil Qusaıynov, Marjan Arapbaeva, Ǵaını Jumasheva, Murat Qoja, Murat Nurǵazıev, Jeńis Seıdollauly, Vıktor ıAshnovskıı, Estaı Muqashev jáne taǵy basqalary kórermenderdi ónerimen tánti etti.
Alǵashqy bolyp, kontserttik orkestr, akterlik quram, qosymsha quramy «Altyn orda» prologymen kontserttik baǵdarlamany bastady. Sonymen qatar, «Abaı sózi» poetıkalyq kompozıtsııa uly aqynǵa kórsetilgen qurmet boldy. Al, aqynnyń «Jelsiz túnde, jaryq aı» áni ulandyq ónerpazdarmen naqyshyna keltirilip oryndaýy kórermenderdiń ystyq yqylasyna bólendi.
Kontserttik zal sahnasynda eljandylyq rýhy men urpaqtar sabaqtastyǵyna toly maıdan jáne áskerı ánder oryndalady. Sondaı-aq, kórermender zamanaýı estradalyq mýzykalardy estip, teatrlandyrylǵan kórinisterdi, ulandyq bıshilerdiń bılerin jáne «Spasskaıa bashnıa - 2019» Halyqaralyq áskerı - mýzykalyq festıval qatysýshylary Ulttyq ulan Qurmet qaraýyl rotasynyń oryndaýyndaǵy qarýmen defıleni tamashalady.
