Ulttyq ulan sarbazdary karantınde qandaı erlikter jasady

Almaty qalasynda Ulttyq gvardııa sarbazdary karantınde qoǵamdyq tártipti buzǵan mas er adamdy ustady. Ulttyq gvardııa áskerıleri men polıtsııa qyzmetkeriniń birikken patrýline áıelder júginip, ishimdikke mas er adamǵa shaǵymdanǵan. Tártip saqshylary ony sabyrǵa shaqyrǵanymen, tártip buzýshy ózin dóreki ustaǵan. Kóshedegi adamdardy balaǵattap, áskerılerge qol kótermek bolǵan. Birneshe eskertýden keıin áskerı jasaq tártip buzýshyny arnaıy quraldarmen toqtatty. Teksere kele, ustalǵan er adamnyń buryn da sottalǵany anyqtaldy. Sot qaraýynan keıin er adam QR ÁQBK 476 jáne 478-baptary boıynsha 35 táýlikke qamaldy.

Kásibılik tanytqan 6654 bóliminiń aǵa leıtenanty Nursultan Rahymbaı men qatardaǵy jaýynger Naýryzbek Іlııasovty«Ońtústik» óńirlik qolbasshylyǵynyń qolbasshysy, general-maıor Talapker Ámrıev marapattady. Qazirgi ýaqytta Almaty qalasynda tótenshe jaǵdaı rejımin qamtamasyz etýge Ulttyq gvardııanyń 1100 áskerı qyzmetshisi úles qosyp keledi.

Al elordalyq sarbazdar karantınde joǵalǵan balany taýyp, ata-anasyna tabystady. 14-sáýir kúni saǵat 15.10-da Almaty aýdanynynyń Ǵ.Músirepov kóshesinde qoǵamdyq tártip pen qaýipsizdikti qadaǵalap júrgen áskerı jasaqqa er azamat kómek surap keldi. Ol shaǵynmarketke kirip azyq-túlik alǵanda, kólikte uıyqtap jatqan 2 jasar uly kóshege shyǵyp ketken. Aınalany 10-15 mınýttaı qarap, ulyn esh jerden tappaǵan.

Jasaq bastyǵy serjant Nursultan Qurashev balanyń joǵalǵanyn áskerı jasaq kezekshisine baıandap, kórshi baǵyttaǵy áriptesterine habarlaǵan jáne patrýl qatardaǵy Eraly Qosymbaı men Beıbarys Qaıyrlıevpen birge izdeý sharalaryna kirisken. Ulandyqtar tóńirekti túgel qarap, jylap turǵan kishkentaı Qaısardy taýyp, ata-anasyna tabystady.

Jańaózen qalasynda Ulttyq gvardııa sarbazdary kóshede esirtki alyp júrgen er adamdy ustady. «Órken» shaǵynaýdanyn kúzetýde patrýl basshysy, kishi serjant Jangeldi Balmaganbet pen qatardaǵy jaýyngerler Baıtóre Itenov jáne Erasyl Mombaı ózin kúdikti ustaǵan er adamdy baıqaǵan. Er adam jan-jaǵyna qarap, patýrlden qashýǵa tyrysqan. Áskerı jasaq kúdiktini ustap, kúrtesiniń qaltasynan bir býma esirtki zatyn (marıhýana) tapqan jáne er adamdy polıtsııa bólimine tapsyrǵan. Qyzmettegi qyraǵylyǵy men joǵary kásibıligi úshin áskerı jasaqty 5548 áskerı bóliminiń komandıri marapattady.

Sonymen birge, mańǵystaýlyq sarbazdar tapanshadan oq atqan er adamdy ustady. Oqıǵa Prımorsk aýdanyndaǵy «Pele Grımm» kafesiniń janynda bolǵan. Qoǵamdyq tártip kúzetinde polıtsııa qyzmetkerimen birge júrgen áskerı jasaq - Orynbek Rahymjan men Batyrjan Baǵytuly kafe mańynda oq atylǵanyn estip, jedel basqarý ortalyǵyna málimdegen. Oqıǵa ornyna jetkende jaýyngerler kúdikti úsh adamdy baıqaıdy. Batyl qımyldap, solardyń birin qolǵa túsiredi. Ustalǵan er adamnan oq-dárilerimen qosa «Baıkal» pnevmatıkalyq tapanshasy tabyldy.

Oqıǵa ornyna Aqtaý qalasy polıtsııa basqarmasynyń jedel tergeý toby shaqyryldy. Tergeýshiler 31 jastaǵy qala turǵynynan tapanshany tárkiledi. Qazirgi ýaqytta QR Qylmystyq Kodeksiniń 287-babyna (qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý) sáıkes tergeý amaldary júrip jatyr. Qyraǵylyǵy men batyl is-áreketi úshin atalǵan sarbazdardy áskerı bólim komandıri marapattady.

Qyzylorda qalasynda patrýldik polıtseı men áskerıler kópqabatty úıdegi órtti toqtatyp, es-tússiz qalǵan tutas otbasyn dalaǵa alyp shyqty. 20 sáýir kúni saǵat 16.30-da patrýl bastyǵy, polıtsııa leıtenanty N. Qaıyrbaev Ulttyq ulan áskerı qyzmetshileri Kırıll Losıtskıı jáne Nııazáli Dáýletpen birge patrýldeý barysynda turǵyn úılerdiń birinen kók tútindi kóredi. Bul týraly 5547 áskerı bóliminiń áskerı qyzmetshileri kezekshige baıandap, medıtsına mamandary men órt sóndirýshilerdi shaqyrǵan jáne ózderi turǵyndary qutqarýǵa kirisken. Olar kópqabatty úıdiń turǵyndaryna órt týraly habarlap, baspanadan shyǵýǵa járdemdesken. Osy ýaqytta turǵyndardyń biri órt shyqqan páterde tutas otbasynyń qalǵanyn aıtady. Áskerı jasaq esikti buzyp, úıge kirgende es-tússiz jatqan tórt adamdy tapty. Osylaısha, polıtsııa qyzmetkeri men Ulttyq ulan áskerıleri barlyq turǵyndardy syrtqa shyǵaryp, olarǵa alǵashqy medıtsınalyq kómek kórsetken. Órt sóndirýshilerge de kómek berip, tilsiz jaýdy birlesip aýyzdyqtady.

Erlik kórsetken jaýyngerler Ulttyq ulan Bas qolbasshysy, general-leıtenant Rýslan Jaqsylyqovtyń buıryǵymen marapattaldy. Áskerı mindetterin adal oryndaǵany, batyl jáne tabandy áreketi úshin jáne joǵary kásibıligi úshin qatardaǵy Nııazáli Dáýlet pen Kırıll Losıtsskııge «Qoǵamdyq tártipti saqtaǵany úshin» tósbelgisi tabys etildi. 5547 áskerı bóliminiń komandıri podpolkovnık Tólebı Chýbaev jeke quram aldynda jaýyngerlerdi quttyqtap, marapattaryn keýdege taqty.

Shyǵys Qazaqstanda Kýrchatov qalasyndaǵy 3514 áskerı bóliminiń qyzmetshisi Dýman Boǵasbaev sýıtsıd jasamaq bolǵan áıeldi qutqaryp qaldy. Oqıǵa 5 mamyr kúni saǵat 19:30 shamasynda bolǵan. Dýman Boǵasbaev óz úıiniń balkonynda turǵan sátte qarama-qarsy eski turǵyn úıdiń 4-shi qabatynan sekirýge oqtalǵan áıeldi baıqaǵan. Ulandyq jaýynger oqıǵa jaıly polıtsııa bólimine habar berip, dereý kómekke umtylady. Sarbaz 4-shi qabatqa kóterilip, sekirýge daıyndalǵan áıeldi ishke tartyp kirgizip alady.

«Shynymdy aıtsam, bul jaǵdaıda áıeldi úgitteýge, qatelik jasamaýǵa ótinip turatyndaı ýaqyt bolǵan joq. Óz ómirine balta shappaı turǵanda, shapshań qımyldap, tez qutqaryp qalý kerek boldy. Óıtkeni, bul oqıǵada adam ómirine qaýip tónip turdy», - deıdi aǵa serjant Dýman Boǵasbaev.

Ózine qol jumsamaq bolǵan azamatshany qaýipsiz orynǵa shyǵarǵan soń, oqıǵa ornyna polıtsııa qyzmetkerleri jetken. Qazirgi ýaqytta quzyrly organdar áıeldi sýıtsıdke ne ıtermelegenin anyqtap jatyr.