Ulttyq ulan sarbazdary ata-analarymen onlaın-rejımde baılanysqa shyǵady
Atalmysh shara áskerde ótip jatqan «Jaýyngerlik januıadaı uıysqan, Ulttyq ulan - eli men halqyna qorǵan!» atty aktsııa aıasynda uıymdastyrylyp otyr.
«Baılanysqa alǵashqy bolyp áskerı qyzmetke Qostanaı oblysynan shaqyrylǵan sarbazdardyń ata-analary 29 shilde kúni saǵat 11.00-de qosylmaq. Osy kúni 100-den asa ata-ana QR Ulttyq ulanynyń 6697 áskerı bólimine (Qostanaı q.) kelip, Otan qorǵaýshylardyń ómirimen, turmystyq jaǵdaıymen tanysatyn bolady», delingen habarlamada.
Sharaǵa Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary general-maıor Muhametqalı Satov, Qostanaı garnızonynyń áskerı prokýrory, oblystyń Qorǵanys isteri jónindegi departament bastyǵy, sonymen qatar 2015 jylǵy jeltoqsan men 2016 jylǵy maýsymda Qostanaı oblysynan shaqyrtylǵan jaýyngerlerdiń jaqyndary qatysady.
Órsetilgen ýaqyt aralyqta oblystan Ulttyq ulanǵa áskerdiń qyr-syryn meńgerý úshin barlyǵy 600-den asa jas órken attanǵan.
Ótken aptada Ulttyq ulanda bastaý alǵan «Jaýyngerlik januıadaı uıysqan, Ulttyq ulan - eli men halqyna qorǵan!» atty aktsııa aıasynda áskerı-patrıottyq baǵyttaǵy kóptegen is-sharalar ótkizý josparlanǵan. Sonyń biri - Ulttyq ulan basshylyǵy men áskerı bólim jetekshileriniń sarbaz ata-analarymen kezdesýi jáne olarǵa perzentteriniń áskerı boryshyn qandaı jaǵdaıda ótkerip jatqandyǵyn óz kózderimen kórýge jasalǵan múmkindik.
Kezdesý barysynda ata-analar aldynda Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary general-maıor Muhametqalı Satov sóz sóılep, qoǵamdyq tártip áskeriniń jaýyngerlik qyzmeti men atqaratyn mindetteri jaıly túsindirip, kópshiliktiń kókeıinde júrgen saýaldaryna jaýap beredi. Sondaı-aq, qonaqtardyń nazaryna balalarynyń sálemdemesi joldanǵan beınejazbalar usynylyp, perzentteri qyzmet atqaryp jatqan áskerı bólimnen tikeleı baılanysta habarlasýǵa múmkindik týady. Taǵy bir aıta keterligi, sharada Ulttyq ulannyń áskerı bólimderindegi Áıelder keńesiniń kontaktileri beriledi, osy nómirler arqyly ata-analar aldaǵy ýaqytta uldarynyń qyzmeti qalaı ótip jatqanyn ózderinen bile alady.
Munan bólek, ata-analarǵa áskerı bólimge ekskýrsııa uıymdastyrylýda, ıaǵnı olar bólim aýmaǵyn, sarbazdardyń jatyn ornyn, ashanasyn, medıtsınalyq lazaretin kórip, qarý-jaraq jáne tehnıkasyn da tamashalaıdy.
Aıta keteıik, bul shara Qazaqstan Qarýly kúshteri arasynda alǵash ret ótkizilgeli otyr.
Tamyz basynda atalmysh estafetany áskerge Aqmola oblysynan shaqyrylǵan sarbazdardyń ata-analary jalǵastyrmaq. Jyldyń sońyna deıin osy tektes kezdesýlerdi QR Ulttyq ulanynyń barlyq áskerı bólimderinde ótkizý josparda bar.
