Ulttyq ulan sarbazdary ant qabyldady (FOTO)
ASTANA. QazAqparat - 18 shilde kúni Ulttyq ulannyń 6636 áskerı bólimine bıyl qabyldanǵan 200-ge jýyq jas sarbaz Áskerı ant qabyldady, dep habarlady «Ulttyq ulan» baspasóz qyzmetinen.
Bólim alańynda ótken rásimge Ulttyq ulan ardagerleri men Bas qolbasshylyq ofıtserleri, aýǵan jáne tájik-aýǵan soǵysynyń ardagerleri, qalalyq qoǵamdyq birlestikterdiń ókilderi men sarbazdardyń týǵan-týystary qatysty. Ata-analar atalǵan sharaǵa erte kelip, uldarymen qaýyshar sátti taǵatsyzdana kútti.
Otan aldyndaǵy boryshyn óteýge kelgen jaýyngerlerdi «Ortalyq» óńirlik qolbasshylyǵy qolbasshysynyń orynbasary polkovnık Jeńis Kúlbaev ómirlerindegi eleýli sátpen quttyqtap, qyzmetterine tabys tiledi. Bir aıdan asa ýaqyt áskerı sálemdesý men sap túzeýge mashyqtanǵan, jaýyngerlik istiń qyr-syryn meńgerip, ant mátinin jattaǵan sarbazdar jınalǵan kópshilikke joǵary daıyndyqtaryn kórsetti. Olar Otanǵa, halyqqa, onyń zańdy túrde saılanǵan Prezıdentine adal bolýǵa, áskerı jáne memlekettik qupııany qatań saqtaýǵa sert berdi. Jaýyngerler atynan sóz alǵan 2-shi oqý rotasynyń atqyshy Dastan Erkinbekov «Jastarǵa qamal bar ma qatar keler? Kúnimiz bolashaqqa nuryn seber. Birigip, bir aýyzdan «Otan» desek, Qazaqstan kók baıraǵyn jelbireter!» dep júrekjardy jyryn arnap, qarýlastaryn elge adal qyzmet etýge shaqyrdy. Sarbazdardyń ata-ana, jaqyn-dostary olardyń áskerı forma kıgenin, avtomat ustap, sap túzep ótkenin súısine tamashalady. Ant qabyldaýshylardy, sondaı-aq, bólimniń ardagerler keńesiniń tóraǵasy Amanǵalı Erekeshev pen ata-analar atynan shyqqan Aıman Berdirahmanovalar da quttyqtap, aq batasyn berdi.
