Ulttyq ulan sarbazdary Aqtaýda er adamdy tapanshamen ustady
AQTAÝ. QazAqparat – Ulttyq ulan sarbazdary Aqtaýda er adamdy tapanshamen ustady, dep habarlaıdy QazAqparat tilshisi.
QR Ulttyq ulany «Batys» óńirlik qolbasshylyǵy baspasóz qyzmetiniń basshysy, podpolkovnık Erbolat Sultanovtyń málim etkenindeı, oqıǵa Prımorsk aýdanyndaǵy «Pele Grımm» kafesi janynda boldy.
Qoǵamdyq tártip kúzetinde polıtsııa qyzmetkerimen birge júrgen qatardaǵy sarbazdar , top basshysy Orynbek Rahymjan men Batyrjan Baǵytuly kafe mańynda oq atylǵanyn estip, jedel basqarý ortalyǵyna málimdeıdi.
Sodan keıin oqıǵa ornyna jetken jaýyngerler kúdikti úsh adamdy baıqaıdy. Batyl qımyldap, solardyń birin qolǵa túsiredi. Kýágerlerdiń qatysýymen qaraǵan kezde oq-dárilerimen qosa «Baıkal» pnevmatıkalyq tapanshasy tabyldy.
Oqıǵa ornyna Aqtaý qalasy polıtsııa basqarmasynyń jedel tergeý toby shaqyryldy. Tergeýshiler 31 jastaǵy qala turǵynynan tapanshany tárkiledi.
Qazirgi kezde QR QK 287-babyna (qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý) sáıkes tergeý amaldary júrgizilýde.
Qyraǵylyǵy men batyl is-áreketi úshin atalǵan sarbazdardy áskerı bólim komandıri yntalandyrdy.
