Ulttyq ulan ofıtseri ushaqta jaǵdaıy kúrt nasharlaǵan áıeldi aman alyp qaldy

NUR-SULTAN. QazAqparat - Oqıǵa Kıevten Nur-Sultan qalasyna ushyp kele jatqan ushaqta bolǵan. Osy reıspen jolaýshy retinde áıelge jedel kómek kórsetken Ulttyq ulan áýe kemesiniń komandıri, maıor Stanıslav Smýrygın de ushyp kele jatqan bolatyn, dep habarlaıdy QazAqparat Ulttyq ulannyń baspasóz qyzmetine silteme jasap.

«Tańǵy saǵat bes shamasy kezi, barlyǵy qalyń uıqyda edi. Bir mezette ushaqtyń ishinde abyr-sabyr bastalyp ketti. Áýe serigi ary-beri júgirip, jolaýshylardan kómek suraı bastady. Osy arada daýys kótergish qurylǵymen «Medıtsına qyzmetkeri bar ma?» dep habar jetkizildi. Ornymnan dereý turdym da, áýe seriginiń qasyna bardym. Ózimdi tanystyrdym. Men dáriger emes, áskerı ushqysh ekenimdi jáne alǵashqy kómek kórsete alatynymdy aıttym. Eń aldymen qan qysymyn ólshedim, 80 de 60 nátıjesin kórsetti. Sol kezde bortserikke tezdetip qara kofe ákel dedim. Qan qysymy kóterildi. Sodan soń ottegi ballonyn berýdi ótindim. Oǵan aýa qajet ekenin ishteı bildim. Osylaısha Nur-Sultan qalasyna da jettik. Jol boıy onyń hálin surap, qolyn qysyp, sózbenen qoldaý kórsetip turdym. Áýejaıda sanıtarlyq brıgada qyzmetkerleriniń qolyna tapsyrdym», - deıdi ulandyq ofıtser.

Barlyq qıyndyqtar men shekteýlerge qaramastan Ulttyq ulan ofıtseri eptilik tanytyp, bilgirliginiń arqasynda áıel adamǵa dereý kómek kórsetip, tipti, ómirin ajaldan arashalap qalǵany shyndyq.

«Osyndaı jaǵdaılarda kómekke kelý – ár azamattyń boryshy, ásirese, pogon taqqandarǵa bul paryz sanalady. Mundaı jaǵdaıǵa alǵash ret tap boldym. Jaı kezde ózim ushaqty basqaramyn, osy joly jolaýshy bola turyp dáriger keıpin eńserdim. Kómek berý úshin bar bilgenimdi jasadym», - deıdi Stanıslav Smýrygın.

Ofıtser mamandyǵy boıynsha áskerı ushqysh. Ulttyq ulan qatarynda 2004 jyldan bastap qyzmet etip keledi.

Kıevke qyzmettik issaparmen barǵan. Áskerı ushaqty basqarýda tájirıbesi mol.

Búginde An-74 áýe kemesiniń komandıri bolyp qyzmet atqarady. Áskerı ushaqpen eki myń saǵattaı áýede bolǵan.