Ulttyq ulan mıtıngige shyqqandardy qandaı jaǵdaıda ustaıdy

NUR-SULTAN. QazAqparat - Ulttyq ulannyń jaýyngerleri mıtıngige qatysýshylardy qandaı jaǵdaıda ustaýǵa quqyly? Ortalyq kommýnıkatsııalar qyzmetinde ótken brıfıngte osyndaı saýal qoıyldy, dep habarlaıdy QazAqparat tilshisi.

Bul suraqqa Ulttyq ulan áskerı keńesiniń hatshysy Saverdın Imırov jaýap berdi.

«Eger patrýldeý baǵytynda qoǵamdyq tártip buzylǵan bolsa, onda árıne, bizdiń áskerı qyzmetshiler zań buzýshylardy zań talaptary boıynsha ustaıdy jáne polıtsııaǵa tapsyrady», - dep túsindirdi Saverdın Imırov.

Áskerı keńes hatshysy mundaı jaǵdaıda áskerı qyzmetshiler óz betinshe sheshim qabyldaı alatynyn eskertti.

«Árıne, olar ózderiniń qyzmet atqarý baǵyty boıynsha jaýap beredi. Eger azamattar buzaqylyq áreketterge jol berse, azamattarǵa qaýip tóndiretin qandaı da bir ákimshilik buzýshylyqtarǵa barsa nemese mas kúıinde qandaı da bir zańsyzdyqtarǵa jol berse, azamattardyń mazasyn alsa, olardy ustaıdy. Beıbit azamattardyń qaýipsizdik quqyǵy bar jáne kóshede alańsyz júrýine jaǵdaı jasalýy kerek» - dedi Saverdın Imırov.

Ol, sondaı-aq, Ulttyq ulannyń qyzmetin áskerı prokýrorlar qadaǵalaıtynyn atap ótti. Ulttyq ulannyń áskerı qyzmetshileri zań buzý faktisi tirkelse, atalmysh organ tıisti sharalar qabyldaıtyny da aıtyldy.

Atalǵan sharada Saverdın Imırov pandemııadan kóz jumǵan Ulttyq ulannyń 2 sarbazy memlekettik ordenmen marapattalǵanyn eske saldy.