Ulttyq ulan «Biz - Jeńistiń muragerlerimiz» estafetasyn ótkizip jatyr

ASTANA. QazAqparat - Uly Jeńistiń 70 jyldyǵyn merekeleýge oraı qazaqstandyq jaýyngerlerdiń Uly Otan soǵysyndaǵy janqııarlyq erligine, Otan qorǵaý jolynda qurban bolǵan sarbazdarǵa qurmet kórsetý, patrıottyq, moraldyq-adamgershilik qundylyqtardy kóterý maqsatynda QR Ulttyq ulanynda «Biz - Jeńistiń muragerlerimiz» estafetasy ótkizilip jatyr.

Bul týraly QR Ulttyq Ulany «Ońtústik» óńirlik qolbasshylyǵynyń baspasóz qyzmetinen habarlady.

Estafetanyń negizgi nyshany - 1941 jyly 15 jeltoqsanda Aqmola oblysynda qurylǵan 72-gvardııalyq atqyshtar dıvızııasynyń Jaýyngerlik Týynyń kóshirmesi. Jaýyngerlik týdyń kóshirmesin ınternatsıonal jaýyngerler Qazaqstan Respýblıkasy Ulttyq Ulany 5573 áskerı bólimine máńgilik saqtaýǵa tabystady.

Jeńistiń 70 jyldyǵyna arnalǵan estafeta osy jyldyń 4 aqpanynan 7 mamyrǵa deıin, 72 - gvardııalyq atqyshtar dıvızııasynyń erligin dáripteý maqsatynda, Qazaqstannyń barlyq qalalaryn aralap ótedi.

Atalǵan dıvızııa surapyl soǵys jyldary Stalıngrad Kýrsk shaıqasyna qatysyp, Ýkraına, Moldavııa, Rýmynııa, Vengrııa, Avstrııa, Chehoslovakııa jerimen júrip ótip, Jeńis kúnin Pragada qarsy alǵan. Dıvızııanyń 31 jaýyngeri Keńes Odaǵynyń Batyry atanǵan.

Atalǵan is-sharanyń jospary boıynsha Jaýyngerlik Týdyń kóshirmesi Almaty qalasyna 2015 jyldyń 19 naýryzynda ákelinip, týdy qabyldaý rásimi men saltanatty is-shara sol kúni 28 panfılovshylar saıabaǵynda saǵat 11:00 ótedi. Oǵan Uly Otan soǵysynyń ardagerleri, jergilikti bılik ókilderi, Almaty qalalyq «Nur Otan» partııasy, stýdent jastar men áskerı bólimder sarbazdary, «Arystan» mamandandyrylǵan lıtseıi men B.Momyshuly atyndaǵy Almaty áskerı mektep ınternatynyń oqýshylary qatysady.