Ulttyq tehnıkalyq damý agenttiginde Tesla-ǵa arnalǵan qazaqstandyq ónim tanystyryldy
ASTANA. QazAqparat - «Ulttyq tehnıkalyq damý agenttigi» AQ basqarmasynyń tóraǵasy Marat Omarov qaı jobalar agenttikten granttyq kómek alǵanyn aıtty, dep habarlady «QazAqparat» HAA tilshisi.
«Biz ınnovatsııalyq ekojúıege qaraımyz. Qazir negizgi baǵyttardyń biri retinde jeke bıznes-ınkýbatorlardy damytqymyz keledi. Innovatorlarǵa naryqqa shyǵýǵa kómektesetin mundaı qurylym ázirge joq. Men Sátpaev tehnoparkine bardym. Ol JOO mańyndaǵy eki qabatty ǵımaratta ornalasqan. Ǵımarat eski. Olardan eki joba kórdim. Birinshisi - Tesla-ǵa arnalǵan qýattaý qurylǵysy. Mamandar 5 mln teńgege elektromobılge arnalǵan osy zarıadtaý qurylǵysyn ázirlegen. Dızaıny álsiz. Senimsizdik tanyttym. Qalaı jumys isteıtinin kórsetýin ótindim. Ázirleýshilerdiń biri elektromobılmen júredi, onyń kóliginde jumys istep tur. Tesla-da da jumys istep tur. Ol da jergilikti, qazaqstandyq ónim. Bizdiń ónim shyǵarýǵa múmkindigimiz jetedi. Muny EYDU men Dúnıejúzilik bank sarapshylary da aıtyp jatyr. Alaıda olardy naryqqa shyǵarýǵa járdemdesetin qurylym joq. Olardan «Kim kómektesti?» dep surasaq, grant almaǵanyn, tálimgerler keńes berip, naryqpen tanystyryp qoldaǵanyn aıtty», - dedi Marat Omarov.
Ol sátti grant alyp, óndirisin qaıta baǵdarlaǵandar jaıly da aıtty. «Ekinshi keıs - 20 mln teńge grant alǵan boıjetkende. Onyń jobasy aýrýhana aýasyn jeldetý, tazartý júıesine qatysty. Bul - sýper ónim. Innovatsııalyq jáne júz protsent jergilikti ónim. Ol aýrýhanalarǵa baryp, óz ónimin tanystyrǵanda, bul aýrýhanaǵa qajet emes ekenin túsinedi. Sosyn bıznes úlgisin ózgertedi, aýrýhanalarǵa taza qabyrǵa men edender shyǵara bastaıdy. Ol 20 mln grant alady.
Onyń jyldyq aınalymy qazir 1 mlrd teńge. Qalypty jumys istep jatyr. Ol granttyń, árıne, óńirlerge alǵash barǵan kezde septigi tıdi. «Sizdiń jigitter maǵan naryqqa shyǵýǵa járdemdesti», - dedi. Qazir onyń jańa óndirisinde 100-ge jýyq adam jumys isteıdi. UTDA-da mundaı mysaldar kóp», - dep atap ótti ol.
Bul rette UTDA qarjylandyrǵan jobalardyń 30 paıyzy sátti, 70 paıyzy sátsiz bolǵan. «Shetelde 10 paıyz sátti bolsa, qalypty sanalady. Bizde jobalardyń basym bóligi - ІT-jobalar, qosymshalar. UTDA jumys istegen sátten bastap 12 mlrd. teńge somasynda 326 grant bólindi», - dedi M. Omarov.
