Ulttyq tárbıege, áke men ananyń róline erekshe kóńil bólý qajet - «Ardager ájeler» komıteti
Astanada ótken «Elimniń taǵdyry - meniń taǵdyrym!» atty I Respýblıkalyq forýmynda Almaty oblystyq «Ardager ájeler» komıtetiniń tóraıymy Dına Nurǵalıeva osy máseleni kóterdi.
«Negizi, ata-babalarymyz sábı kezinen bastap ulttyq tárbıe berip, olardyń óse kele, óz elin súıýge, halqyn qorǵaýǵa baýlyǵan. Bul rette, asqaraly atalardyń baısaldylyǵy men parasattylyǵy, aıaýly ájelerdiń kemeldigi men keńdigi qajet. Sol qadir-qasıetti, asyl minez-qulyq kelinderimiz ben qyzdarymyzǵa darysa, olar kórgen-bilgenin balalaryna jetkizse, urpaq sabaqtastyǵy órbı túsedi. Búginde elimizde urpaq bolashaǵyna, olardyń bilim men tárbıe alýlaryna, salamatty ómir súrýlerine basa kóńil bólinip keledi. Dese de, ulttyq tárbıege, áke men ananyń róline negizgi basymdyq bergen jón», - deıdi D.Nurǵalıeva.
Komıtet tóraıymy atap kórsetkendeı, búginde «Ardager ájeler» uıymynyń arnaıy baǵdarlamasyna sáıkes, oblys mektepterinde ulttyq tárbıe berý máselesine arnalǵan dárister ótkiziledi.
