Ulttyq sýrdlımpıadalyq federatsııasy Almaty ákimdigine ne úshin shaǵymdandy
ALMATY. QazAqparat - «Ulttyq sýrdlımpıadalyq federatsııa» respýblıkalyq qoǵamdyq birlestigi Almaty qalasynyń ákimdigine shaǵym túsirdi, dep habarlaıdy QazAqparat tilshisi.
Birlestik Sýrdlımpıada chempıondaryna kommýnaldyq turǵyn úı qorynan baspana berilmegeni úshin shaǵymdandy.
Almaty qalalyq sotynyń málimetinshe, is materıaldarynan belgili bolǵandaı, 2019 jyly jeltoqsan aıynda Italııada ótken Qysqy sýrdlımpıada oıyndarynda tórt otandasymyz altyn medal jeńip alǵan.
Al Olımpıada, Paralımpıada jáne Sýrdlımpıada oıyndarynyń chempıondary men júldegerlerin jergilikti atqarýshy organ baspanamen qamtamasyz etýi mindetti sanalady. Merzimi boıynsha resmı sheshim nemese hattama alynǵan kúnnen bastap alty aıdan keshiktirilmeý kerek. Marapattaýdyń bul túri «Dene shynyqtyrý jáne sport týraly» zańynda da qarastyrylǵan.
Sýrdlımpıada – estý qabileti nashar múgedek sportshylar qatysatyn qysqy jáne jazǵy halyqaralyq jarystar.
«Birlestik 2020 jyldyń 28 tamyz ben 2021 jyldyń 25 qańtarda qalalyq sport basqarmasyna chempıondarǵa páter berý máselesi boıynsha ótinish joldaǵan bolatyn. Oǵan tıisti jarystardyń hattamalaryn da tirkegen. Degenmen, memlekettik organ «páter berý jumystary júrgizilip jatyr» dep isti uzaqqa sozǵan. Sýrdlımpıada chempıondaryna bir jyldan astam ýaqyt boıy baspana berilgen joq.
Jergilikti atqarýshy organnyń uzaq ýaqyt áreketsizdigin, chempıondardy baspanamen qamtamasyz etý boıynsha naqty sharalardy qabyldamaǵanyn eskere otyryp, Almaty qalasynyń ákimshilik soty talap aryzdy qanaǵattandyryp, olardyń talaptaryn tolyǵymen qoldady. Sport sheneýnikteriniń áreketsizdigi zańsyz dep tanyldy. Apellıatsııalyq ınstantsııa Mamandandyrylǵan aýdanaralyq ákimshilik sotynyń sheshimin kúshinde qaldyrdy.
Olımpıadashylar otan namysyn qorǵaıdy. Sporttyń qaı túri ekeni mańyzdy emes, olar eń bastysy otanymyzdyń týyn bıikte jelbiretedi. Olar zańdy marapattaýǵa ábden laıyq. Olardyń baspana kiltin kútip, tabaldyryq tozdyryp, aqyry sot júıesiniń olardy qorǵaý úshin júgingeni ókinishti», - dep málim etti qalalyq sotta.
Sottyń sheshimi zańdy kúshine engennen keıin bir aı ishinde sportshylarǵa baspanany óteýsiz negizde berý týraly sheshim qabyldandy.
