«Ulttyq sportymyz qashanǵy ógeı balanyń kúıin keshpek» - Respýblıkalyq basylymdarǵa sholý

ASTANA. 14 jeltoqsan. QazAqparat /Aıdar Ospanalıev/ - Qazaq aqparat agenttigi respýblıkalyq basylymdarda 14 jeltoqsan, sársenbi kúni shyqqan ózekti materıaldarǵa sholýdy usynady.

***

«Egemen Qazaqstan» basylymynyń búgingi sanynda «Órkenıetter alıansy: únqatysýdan - naqty naqty iske nyq qadam» atty maqala jarııalandy. Onda BUU Órkenıetter Alıansynyń Katar astanasy - Dohada ótken «Mádenıetter arasyndaǵy baılanystardy da­mytý maqsatyndaǵy únqatysý» taqyrybyndaǵy IV forýmynda kóterilgen máseleler týraly jazylady. Dohada uıymdastyrylǵan ІV forým - mádenıetter, mádenı sanalýandylyq pen mádenıet­ara­lyq únqatysý múmkindikterin jú­ze­ge asyrýdy basshylyqqa alýy­men erekshelendi. Bul izgi bastama osyndaı máselelerdiń bir júıege kelýine jáne kezdesken túıtkilderdiń tarqatylýyna múd­deles seriktesterdiń bilimi men tájirıbelerin biriktiretin, ózara senimdi nyǵaıtý arqyly álemde beıbitshilik ornatatyn jalpyǵa ortaq tuǵyrnamaǵa aınalýy tıis. Forým ózegi osyǵan saıdy.

Sondaı-aq osy basylymnyń jazýynsha, keshe Syrtqy ister mınıstrliginde elimizdiń shet elderdegi elshileriniń qatysýymen keńeıtilgen keńes otyrysy ótti. El Táýelsizdiginiń 20 jyldyǵyn atap ótý qarsańynda bolǵan basqosýǵa Otanymyzdyń shet elderdegi barlyq elshileri keldi. Otyrysta syrtqy saıası máseleler talqylandy. Dıplomattardyń mundaı bas­qo­sýy osydan tórt jyl buryn ótkeni belgili. Sodan beri halyq­aralyq qatynastarda, kópjaqty deńgeıdegi syrtqy saıasatta ma­ńyz­dy máselelerdi talqylaý ózek­ti bola tústi. Syrtqy ister mı­nıstri Erjan Qazyhanov táý­el­sizdik alǵan jyldar ishinde Qa­zaqstan ekijaqty jáne kópjaqty deńgeıde ózin senimdi áriptes jáne halyqaralyq qoǵamdastyq­tyń jaýapty múshesi ekenin dá­lel­deı bilgendigin erekshe atap ótti. Bul jıynda kóterilgen jaıttardy «Egemen Qazaqstan» basylymynyń búgingi sanyndaǵy «Keleli máselelerge qurylǵan keńes» atty maqaladan bilesizder.

***

Elimizde Syrtqy ister mnıstrliginiń muryndyq bolýymen ǵylymı jáne akademııalyq top ókilderine jetekshi saıasattanýshylar men sarapshylardy tarta otyryp, Syrtqy saıasat keńesin qurý máselesi talqylanýda. «Atalǵan keńes taldaý jumysynyń sapasyn arttyrý jáne syrtqy bastamalar ázirleýdiń balamaly «saraptamalyq alańyna» aınalýy tıis»,-deıdi Syrtqy ister mınıstri Erjan Qazyhanov. Onyń sózinshe, syrtqy saıasattaǵy ınvestıtsııa, tehnologııa men bilimdi tek batystan ǵana emes, sonymen qatar beldi azııalyq memleketterden de tartyp, eýrazııalyq ıntegratsııalyq rýhpen ushtastyrýymyz kerek. Bul týraly «Aıqyn» basylymynyń búgingi sanyndaǵy «Syrty saıasat keńesi qurylmaq» atty maqaladan keńirek bilýge bolady.

Osy basylymynyń jazýynsha, «Qazaqstannyń keleshegi - qazaq tilinde». Osyndaı taqyryppen jarııalanǵan maqalada sońǵy10 jylda qazaq tiliniń aıasy aıtarlyqtaı keńidi deýge negiz bar. Qazaq tilinde bilim beretin balabaqsha sany 1 myń 178-ge, mektepter sany 3 myń 821-ge artqan. Memlekettik is-qaǵazdaryn memlekettik tilge kóshirý protsesi de qarqyndy júzege asyrylýda. Búgingi kúni ortalyq jáne jergilikti atqarýshy organdardaǵy memlekettik tildegi is-qaǵazdaryn júrgizý úles salmaǵy 85 paıyzdy qurap otyr. «Aıqyn» basylymy búgingi sanynda memlekettik tildiń búgingi jaǵdaıy men bolashaǵyna naqty faktiler arqyly jan-jaqty saraptama jasaıdy.

***

Alyp shahar Almatydaǵy «shaıtan bazardyń» mańynda qasapshylyqty kásip etkender seńdeı soǵylysady. Bazarǵa jýyq mańaıdaǵy úılerdiń aýlasy, ıakı qorasy shaǵyn qasaphana oshaqtaryna aınalypty. Qolqany qabatyn qan-jynnyń múńkigen jaǵymsyz ıisi turǵyndardyń narazylyǵyn týdyryp otyr. Bul másele «Alash aınasy» basylymynyń búgingi sanynda «Qadiri qashqan qasaphana nemese mal soıý mádenıetin nege joǵalttyq» atty maqalada.

Sondaı-aq osy basylymnyń jazýynsha, elordada QR Ulttyq sport túrleri qaýymdastyǵynyń keńeıtilgen respýblıkalyq semınar-keńesi ótti. Onda ógeı balanyń kúıin keship otyrǵan ulttyq sportymyzǵa áli kúnge deıin Úkimet tarapynan qajetti qarjy bólinbeı turǵany sóz bolǵan. Shama-sharqynsha ulttyq sportymyzdyń kóshin túzep júrgen azamattardyń jýyrda ǵana merziminen buryn tarap tynǵan depýtattarǵa da ókpesi qara qazandaı eken. Óıtkeni olar ulttyq sportty damytý týraly zań jobasyn Úkimetke jetkizbeı, aıaqsyz qaldyrypty. Endigi maqsat - sol jobany qaıtadan talqylap, jańadan saılanatyn 5-shi Parlament Májilisine qaıta usyný bolyp otyr. Bul másele jóninde «Alash aınasy» basylymynyń búgingi sanyndaǵy «Ulttyq sportymyzy qashanǵy ógeı balanyń kúıin keshpek» atty maqaladan keńirek bilýge bolady.