Ulttyq sporttyń 20-dan astam túrine erekshe kóńil bólindi - Aqtoty Raıymqulova

NUR-SULTAN. QazAqparat – Parlament Májilisinde QR Mádenıet jáne sport mınıstri Aqtoty Raıymqulova ulttyq sportty damytý jaǵdaıyn baıandady, dep habarlaıdy QazAqparat tilshisi.

«Táýelsizdik jyldarynda ulttyq sporttyń 20-dan astam túri belsendi damydy. 2019 jyldyń qorytyndysy boıynsha ulttyq sport túrlerimen 399 myńnan astam adam aınalysty. Búgingi tańda Qazaqstanda ulttyq sport túrleri boıynsha 8 mamandandyrylǵan klýb jáne 13 mamandandyrylǵan sport mektebi bar», - dedi A. Raıymqulova Parlament Májilisindegi Úkimet saǵatynda.

Sonymen qatar mınıstr «Qazaqstan barysy» jobasy bizdiń ulttyq sportymyzdyń brendine aınalǵanyn, «Eýrazııa barysy» men «Álem barysy» týrnırlerin uıymdastyr arqyly halyqaralyq deńgeıge shyǵý múmkin bolǵanyn atap ótti.

Taratylǵan málimetke qaraǵanda, 2021 jyly Nur-Sultan qalasynda І Álemdik etnosport oıyndaryn ótkizý bastamasy qarastyrylýda. Bul oıyndarda 15 sport túri boıynsha jarys ótkizý josparlanǵan.

Budan buryn habarlanǵandaı, 2019 jyldyń qorytyndysy boıynsha elimizde dene shynyqtyrý jáne sportpen júıeli túrde shuǵyldanatyndar sany 5,7 mln adamǵa jetken. Bul jalpy halyqtyń 30,6 paıyzy.