Ulttyq sporttan el chempıonatynyń ótetin oryny Tarazǵa aýysty
NUR-SULTAN. QazAqparat - Ulttyq sporttan eresekter arasyndaǵy bıylǵy Qazaqstan Respýblıkasynyń chempıonaty Taraz qalasynda ótkiziletin bolyp ózgertildi, dep habarlaıdy QazAqparat tilshisi.
QR Ulttyq sport qaýymdastyǵy habarlaǵandaı Respýblıkanyń basty básekesi 19-26 mamyr aralyǵynda ótpek.
Negizinde, elishilik chempıonat jyl basynda bekitilgen jospar boıynsha Almaty qalasynda uıymdastyrylýy tıis bolatyn. Biraq, túrli sebepterge baılanysty jýyqta eresekter chempıonatynyń 19-26 mamyrda Taraz qalasynda ótkiziletini anyqtaldy.
QR Mádenıet jáne sport mınıstrligi bekitken «2019 jylǵy buqaralyq-sporttyq respýblıkalyq jáne halyqaralyq jarystardyń kúntizbesine» sáıkes, QR Ulttyq sport qaýymdastyǵynyń uıymdastyrýymen ótetin bıylǵy chempıonattyń ereksheligi - elimizdiń barlyq óńirindegi 17 komanda tolyq qatyspaqshy. Báseke ótetin oryn - Jambyl oblysy, Jambyl aýdany, Bektóbe aýylyndaǵy ıppodrom. Mekenjaıy oblysqa qaraǵanymen, bul atshabar Taraz qalasynyń irgesinde ornalasqan.
Sonymen, kókpardan - HІH, aýdaryspaqtan - HІH, teńge ilýden - HІІI, jamby atýdan - V ret ótkiziletin eresekter arasyndaǵy Qazaqstan chempıonatyna daıarlyq qazirgi kezde qyzý júrgizilýde.
Ulttyq sporttyń esepshotyn qaqqan mamandardyń boljaýynsha, ásirese, bıylǵy elishilik jarysta kókparshylar básekesi óte tartysty ótýge tıis. Sebebi, qarasha aıynda Ózbekstanda komandalyq kókpardan Álem chempıonaty uıymdastyrylady. Bıylǵy Qazaqstan chempıonatynda jeńimpaz atanyp, kózge túsken kókparshylardan osy Álem chempıonatynda el namysyn qorǵaıtyn Ulttyq qurama komanda jasaqtalmaq.
Sondyqtan, kókpardan birneshe jylda bir ret ótetin Álem chempıonatyna joldama alý úshin kókparshylarymyz elishilik chempıonatta erekshe oıyn órnegin kórsetedi dep kútilýde.
Jankúıer jadyna salyp ótsek, kókpardan Qazaqstan ulttyq qurama komandasy 8 memleket komandasy qatysqan Azııa chempıonatynda (2013), 11 memleket komandasy qatysqan Álem chempıonatynda (2017) bas júldeni jeńip alǵan. Sondaı-aq, qazirgi kezge deıin Qazaqstan ulttyq qurama komandasy kókpardan uıymdastyrylǵan halyqaralyq jarysqa toǵyz ret qatysyp, alty dúrkin chempıon atandy.
