Ulttyq sport janashyrlary «Altyn tuǵyr» músinshelerimen marapattaldy
ASTANA. QazAqparat - Astanada QR Ulttyq sport túrleri qaýymdastyǵynyń uıymdastyrýymen, «Nur Otan» partııasynyń qoldaýymen «Altyn tuǵyr» jyl saıynǵy syılyǵynyń marapattaý rásimi ótti.
«Altyn tuǵyr» baıqaýy osymen tórtinshi ret ótkizilip keledi. Onyń maqsaty - ulttyq oıyndardyń jastar arasynda keń taralyp, ultymyzdyń baǵa jetpes qazynasyn damytýǵa súbeli úles qosqan aqtańger azamattardy halyqqa tanystyrý, arnaıy marapattaý, dep habarlaıdy QazAqparat «Nur Otan» HDP-nyń baspasóz qyzmetine silteme jasap.
Ulttyq sport túrleri qaýymdastyǵynyń prezıdenti Bekbolat Tileýhan bul jylǵy marapattaý el Táýelsizdiginiń 25 jyldyǵymen qatar kelip, oǵan erekshe mán berilip turǵanyn tilge tıek etti.
«Bıyl óshkenimizdiń janyp, ólgenimizdiń tirilgenine, Táýelsizdik alǵanymyzǵa - shırek ǵasyr toldy. Ulttyq oıyndar úlken aýyl toılary men úlken asta ǵana oınalǵany jasyryn emes. Búginde álemdik deńgeıge jetip otyr. Іrgedegi alyp kórshimiz aýdaryspaǵymyzdy áspettep, ekinshi Azııa chempıonatyn ótkizdi. Aldymyzda EKSPO - 2017 kórmesi kele jatyr. Barlyq kórmelerde záýlim, kóz toımas erekshe salynǵan ǵımarattar kezige beredi ǵoı. Al, biz qazaq nemen erekshelenbekpiz? «Mine, bizdiki» dep neni birinshi kórsete alamyz? Sóz joq, ulttyq sport túrlerin maqtanyshpen pash ete alamyz», - dedi Bekbolat Tileýhan.
Búginde kókpar, báıge, aýdaryspaq, jamby atý, teńge ilý sekildi oıyn túrleri halyqaralyq deńgeıge kóterildi. Atap aıtar bolsaq, sportshylarymyz Qytaı elinde ótken II Azııa chempıonaty, Qyrǵyzstanda ótken «Kóshpeliler oıyndary», Almaty qalasynda uıymdastyrylǵan «Uly dala oıyndary» syndy aǵymdaǵy jyldaǵy iri halyqaralyq jarystarda top jara bildi.
«Nur Otan» partııasynyń hatshysy Qanybek Jumashev eldi azattyqtyń shırek ǵasyrlyq merekesimen quttyqtap ótti. «Qazaqta «At óneri bilinbes báıgege túsip jaryspaı, er óneri bilinbes qoıan-qoltyq alyspaı» degen maqal bar. El azamaty men astyndaǵy qazanatynyń qadirin bilip, el bolyp, jurt bolyp ulttyq ónerdi, ulttyq sportty damytý - bizdiń basty maqsatymyz», - ol.
2016 jylǵy «Altyn tuǵyr» ıegerleri:
«Úzdik kókparshy» - Ábdijapparov Ábýǵalı (Jambyl oblysy)
«Úzdik aýdaryspaqshy» - Jumalıev Túımebek (Ońtústik Qazaqstan oblysy)
«Úzdik atbegi» - Omarov Ulan (Almaty oblysy)
«Úzdik teńge ilýshi» - Saparbek Maǵjan (Ońtústik Qazaqstan oblysy)
«Úzdik jamby atýshy» - Badashev Eldos (Ońtústik Qazaqstan oblysy)
«Úzdik toǵyzqumalaqshy» - Serik Aqtaev (Ońtústik Qazaqstan oblysy)
«Úzdik aýdaryspaqshy» - Saǵymbaev Arman (Aqtóbe oblysy)
«Úzdik balýan» - Dáýlethan Jaqypov (Jambyl oblysy)
«Úzdik mektep basshysy» - Ǵanı Ahmetbaev (Ońtústik Qazaqstan oblysy)
«Úzdik klýb basshysy» - Ónerbaı Janbala (Atyraý oblysy)
«Úzdik fılm» - Rústem Ábdirashev (Ulttyq sportty nasıhattaǵan «Almas qylysh» atty fılmniń rejısseri)
«Elimjan» ordeniniń ıegeri - búrkitshi Japar Satylǵanov (Jambyl oblysy)
Sondaı-aq birqatar azamat alǵys hattarmen marapattaldy.
