Ulttyq sport túrleri bilim berý baǵdarlamasyna engizilmek

NUR-SULTAN. QazAqparat - Qazaqstanda ulttyq sport bilim berý baǵdarlamasyna engizý qolǵa alynbaq. Bul týraly búgin Zań jobalaý qyzmeti máseleleri jónindegi vedomstvoaralyq komısssııa otyrysynda QR Mádenıet jáne sport vıtse-mınıstri Eldos Ramazanov aıtty, dep habarlaıdy QazAqparat tilshisi.

Otyrysta vıtse-mınıstr «Qazaqstan Respýblıkasynyń keıbir zańnamalyq aktilerine dene shynyqtyrý jáne sport máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańy jobasynyń tujyrymdamasyn tanystyrǵan bolatyn. Atalǵan qujatta bilim berý uıymdarynda dene shynyqtyrý men sportty damytý baǵyttarynyń biri retinde bilim berý baǵdarlamalaryna ulttyq sport túrlerin engizý kózdeledi. Bul óz kezeginde ulttyq sport túrleriniń tanymaldyǵyn arttyryp, jastardyń Otanǵa degen súıispenshiligin kúsheıtedi. Dene shynyqtyrý jáne sportpen aınalysýshylar sanynyń artýyna septigin tıgizedi.

«Oqýshylar arasynda dene shynyqtyrý jáne sporttyń tanymaldyǵyn arttyrý úshin sporttyq sharalardyń sanyn arttyrý qajet. Al aýyldyq eldi meken turǵyndaryn dene shynyqtyrý jáne sportqa yntalandyrý úshin negizinen oqý oryndarynda shoǵarlandyrylǵan sport ınfraqurylymyn paıdalanǵan jón. Aǵymdaǵy jaǵdaıdy taldaý, sonymen qatar balalar, jasóspirimder jáne jastar densaýlyǵyn nyǵaıtý boıynsha negizdi basqarýshylyq sheshim qabyldaý úshin fızıkalyq daıyndyq pen fızıkalyq damý monıtorıngin júrgizý qajet. Dene shynyqtyrý jáne sportpen aınalysatyn halyqtyń densaýlyǵyn nyǵaıtý, qoldaý jáne qalpyna keltirý úshin dárigerlik-dene shynyqtyrý dıspaenserlik jumystardy nyǵaıtý kerek», - dedi Eldos Ramazanov.