Ulttyq sport oıyndarynan Qazaqstannyń óziniń olımpıadasy bolýy kerek - Erǵalıev
ASTANA. QazAqparat - Elimizdiń ulttyq sport túrlerin, onyń chempıondaryn nasıhattaý múldem joq. Búgin QR Parlamenti Senatynyń Áleýmettik-mádenı damý jáne ǵylym komıtetinde «Dene tárbıesi jáne sport máseleleri boıynsha QR-dyń birqatar zańnamalyq aktilerine ózgertýler men tolyqtyrýlar engizý jónindegi» zań jobasyn talqylaý barysynda senator Jabal Erǵalıev osylaı dedi, dep habarlaıdy QazAqparat.
«Ulttyq sport ol bizdiń ultymyzdyń kody ekendigin esten shyǵarmaýǵa tıispiz. Myna bir másele meni qatty alańdatady. Ótken jylǵy Qazaqstannyń toǵyzqumalaqtan balalar, jasósipirimder, eresekter arasyndaǵy chempıony kim ekendigin bilmeımin. Jarnama joq. Aýdaryspaqtyń chempıony kim? Bilmeımin. Kókpardan qaı oblystyń komandasy chempıon? Ony taǵy da bilmeımiz. Televızordan kóretinimiz Ten, Golovkın, boldy, solardy ǵana nasıhattaý. Elimizde shyǵyp jatqan chempıondardy nege nasıhattamaımyz. Mysaly, aýyldyń qara domalaq balasy toǵyzqumalaqtan Respýblıka chempıony bolyp keledi. Onymen eshkimniń sharýasy joq. Ata-anasy uıalǵannan bir sháýgim shaı beredi de sonymen ol chempıon aýylda qalady. Nege ony nasıhattamaımyz?» - dedi senator.
Sonymen qatar ol osydan 5-6 jyl buryn Qazaqstan fýtbolshylary Iordanııaǵa barǵanda sol jaqta turyp jatqan qazaq otbasylary ulttyq quramamyzdyń sapynda «Assalaýmaǵaleıkým» dep amandasar otandasynyń bolmaǵandyǵyna qapa bolǵandyqtaryn atap ótti.
«Árıne, olımpıadalyq kórsetkishterimiz jaqsy bolǵany durys. Biraq ulttyq sport oıyndarymyzdyń túrinen Qazaqstannyń óziniń olımpıadasy bolýy kerek. Elbasynyń ulttyq jańǵyrý baǵdarlamasyna sáıkes ulttyq sport túrlerin jańǵyrtýdyń Respýblıka boıynsha jańa baǵdarlamasyn ázirleýge kóńil bólýlerińiz kerek», - dedi Erǵalıev Mádenıet jáne sport mınıstrliginiń basshylaryna qarata.
