Ulttyq sport olımpıadalyq sport túrlerimen teńdeı dárejede damıdy
ASTANA. QazAqparat - Ulttyq sport olımpıadalyq sport túrlerimen teńdeı dárejede damıtyn bolady. Bul týraly búgin Májiliste «Dene shynyqtyrý jáne sport týraly» zań jobasyn talqylaý barysynda málim boldy.
QR Sport jáne dene shynyqtyrý agenttiginiń tóraǵasy Tastanbek Esentaevtyń aıtýynsha, jańa redaktsııadaǵy zań jobasynda ulttyq sport túrlerin damytýǵa qatysty máseleler jeke bappen qarastyrylyp otyr. «Bul rette ulttyq sporttyń ózindik erekshelikteri esepke alyna kele, olardy olımpıadalyq sport túrlerimen teń dárejede damytýdy kózdep otyrmyz», - deıdi Tastanbek Esentaev.
Agenttik basshysynyń sózine qaraǵanda, qujat boıynsha dene shynyqtyrý jáne sportty damytý baǵytynda Úkimettiń quzyreti keńeıtiledi. Atap aıtqanda, dene shynyqtyrý jáne sport salasyndaǵy memlekettik saıasattyń negizgi baǵyttary ázirlenedi. Budan bólek, halyqaralyq jarystardyń jeńimpazdary men júldegerlerine, sport túrleri boıynsha qurama komandalar jattyqtyrýshylary men múshelerine qarjylaı syıaqy tóleý qaǵıdalary men tizbesi bekitilmek. Sonymen qatar, sportshylar men jattyqtyrýshylarǵa ómir boıy aı saıynǵy materıaldyq qamtamasyz etý tólemderiniń qaǵıdalary naqtylanyp, mólsheri bekitiledi.
«Sonymen qatar, sporttyq federatsııalardy akkredıtteýge qoıylatyn jańa talaptar belgilenetin bolady. Bul shara respýblıkalyq jáne jergilikti deńgeıde júzege asady. Osyǵan oraı, olımpıadalyq jáne olımpıadalyq emes sport túrlerine, sonymen qatar ulttyq sport túrleri erekshelikterine qaraı federatsııalarǵa qoıylatyn talaptar aıqyndaldy», - deıdi agenttik tóraǵasy T.Esentaev.
