Ulttyq saraptama ortalyǵy ónimderdiń halal standartyn rastap otyratyn bolady
ASTANA. QazAqparat - QR Ulttyq saraptama ortalyǵy men Qazaqstan Musylmandary dinı basqarmasynyń «Halal Damý» JShS otandyq halal ónimderdi damytý salasyndaǵy memorandýmǵa qol qoıdy, dep habarlaıdy QazAqparat.
«QR DSM Qoǵamdyq densaýlyq saqtaý komıteti Ulttyq saraptama ortalyǵynyń dırektory Qanat Balyqbaev pen QMDB «Halal Damý» JShS Ánýar Eljanov qoǵamdyq densaýlyqty baqylaý men halyqtyń sanıtarlyq-epıdemıologııalyq qaýipsizdigin arttyrý salasynda yntymaqtastyq týraly memorandýmǵa qol qoıdy. Taraptar naryqqa otandyq ınnovatsııalyq ónim shyǵarýdy, halal ónimderdiń sapasyn arttyrýdy, halal-ındýstrııa salasynda tájirıbe almasý men ózge de sharalardy uıymdastyrýdy qarastyryp otyr», - dep habarlady ortalyqtyń baspasóz qyzmetinen.
Kezdesý barysynda Qanat Balyqbaev ortalyq qyzmeti týraly aıtyp berdi. Onyń aıtýynsha, árbir óńirde zerthanalar jumys isteıdi, onda ónimderdiń sapasyn, jasalý tehnologııasyn tekserýge bolady.
«Hımııalyq ónerkásip pen dástúrli taǵamdardy arzan almastyrǵyshtardyń damýymen azyq-túlik ónimderine saraptama jasaý ózekti bola tústi. Bizdiń mamandar dúken sóresindegi ónimderdiń halyqqa qaýip tóndirmeýi úshin jumys isteıdi», - dedi ol.
Yntymaqtastyq aıasynda et ónimderindegi janýar tininiń sáıkestigine zertteýler júrgizý, alkogolsiz sýsyndardyń talaptarǵa saı kelýi tekseriledi.
