Ulttyq sanaqty ótkizýge kimder, qandaı jalaqyǵa qabyldanady

NUR-SULTAN. QazAqparat – QR Strategııalyq josparlaý jáne reformalar agenttigi Ulttyq statıstıka bıýrosy bıylǵy 1 qyrkúıekte bastalatyn ulttyq sanaqty ótkizýge qansha adam tartylatynyn, olarǵa qoıylatyn talaptar men jalaqy kólemin atady, dep habarlaıdy QazAqparat.

Halyq sanaǵyn ótkizý úshin ýaqytsha jumysqa kelesi talaptarǵa sáıkes keletin Qazaqstan azamattary tartylady: jasy 18-den joǵary, bastamashyl, jaýapty, tez til tabysatyn, kompıýtermen jumys jasaı alatyn. Jumys ótiline jáne kásibı bilimine talaptar qoıylmaıdy.

«Qazirgi ýaqytta 17 aımaqtan jalpy sany 85 adamnan turatyn ulttyq sanaqty daıyndaý jáne ótkizý jónindegi shtattan tys bólimder quryldy. Barlyq qyzmetkermen eńbek kelisimsharty jasaldy, dárejelerine baılanysty 65-105 myń teńge aralyǵynda aılyq eńbekaqy belgilendi. Bul bólimder óz aımaqtary boıynsha sanaqqa daıyndyq jáne ótkizý boıynsha uıymdastyrý jumystaryn júrgizýde, ýákilderdiń, nusqaýshy-baqylaýshylardyń jáne ıntervıýerlerdiń jumystaryn baqylaýda», - dedi vedomstvodan.

Sondaı-aq málim etilgendeı, sanaqty uıymdastyrý jáne ótkizý úshin aýdan ortalyqtaryndaǵy jáne aýyldyq okrýgterdegi statıstıkanyń aýmaqtyq bólimshelerinde 997 nusqaýshy (ýákilder) jumysqa tartylatyn bolady. Ýákilderdiń eńbekaqysy 85 477 teńgeni quraıdy. Sondaı-aq, aılyqtyń 10% mólsherinde jalaqyǵa ústeme qarastyrylǵan.

Nusqaýshylardyń mindetine jatady: sanaqtyń júrgizilýin BAQ-ta jarııalaýdy uıymdastyrý; sanaq qyzmetkerlerin tańdaý, olardy oqytý jáne úılestirý; sanaqtyq aýdandastyrýdy (tirkeý, nusqaýshylyq jáne eseptik ýchaskelerge bólý) qurýdy qamtamasyz etý; turǵyndar sanaǵyn ótkizýge qatysý.

Málimetterdi jınaý boıynsha tikeleı jumysqa ýaqytsha 32 313 maman: nusqaýshy-baqylaýshylar jáne ıntervıýerler qabyldanatyn bolady. Intervıýerlermen jáne nusqaýshy-baqylaýshylarmen aqyly qyzmet kórsetý boıynsha kelisimsharttar jasalady. Intervıýerlerdiń 1-shi jáne 2-shi kezeńniń jumysyna aqy tóleý tolyq kólemde qyzmet kórsetilgen jaǵdaıda 30 kúnge 83-104 myń teńgeni quraıdy. 1-shi jáne 2-shi kezeńniń nusqaýshy-baqylaýshylaryna tolyq kólemde kórsetilgen qyzmet úshin 45 kúnge 125 014 teńge tóleý josparlanýda. Intervıýerler 1-30 qazan aralyǵynda sanaqtan onlaın-rejımde ótpegen respondentterdiń úılerine barady. Olar suraqtardyń jaýabyn planshetterge engizip alady.

2021 jylǵy sanaqtyń urany - «Qazaqstanda árkim mańyzdy! V Kazahstane kajdyı vajen!».

Buǵan deıin habarlaǵanymyzdaı, elimizde ulttyq sanaq 2021 jyldyń 1 qyrkúıegi - 30 qazany aralyǵynda ótedi.

Qazaqstandyqtar barlyǵy 87 suraqqa jaýap beredi.

Ulttyq sanaqqa birneshe jolmen qatysýǵa bolady.

Halyq sanaǵy ótetin kezeńde call-ortalyq jumys jasaıdy.