Ulttyq sanaqqa Túrkistan oblysynyń daıyndyǵy qalaı
Ulttyq statıstıka bıýrosynan málim etkendeı, eń aldymen ol Ózbekstanmen shekaralas turǵan Jetisaı aýdanyna bardy. Onda qazir 4 ınstrýktorlyq ýchaske jumys isteýde. Sondaı-aq, Bıýro tóraǵasy Maqtaaral, Keles jáne Saryaǵash aýdandaryna baryp, ondaǵy jaǵdaıdy kózimen kórip qaıtty.
Sanaqqa daıyndyq kezeńinde turǵyn úılerdiń (páterlerdiń) jáne turǵyn úı retinde paıdalanylatyn turǵyn emes orynjaılardyń tizimi naqtylanýda. Bul, negizgi kezeńdi júrgizý úshin qajet. Sol arqyly halyq sanaǵynyń negizgi kezeńinde sanaq qyzmetkerlerine beriletin júktemeniń mólsherge saı bolýy, halyq sany men aýmaqtyń nusqaýshylyq jáne tirkeý ýchaskeleriniń teń bólinýi qamtamasyz etiledi.
Túrkistan oblysynda 50 nusqaýshylyq ýchaske qurylǵan. Ulttyq sanaqqa daıyndyq jáne ótkizý jónindegi nusqaýshylarmen (ýákil 126 adam) eńbek kelisimsharty jasalǵan. Sondaı-aq, nusqaýshy-baqylaýshylarmen, ıntervıýerlermen aqyly qyzmet kórsetý kelisimsharty jasaldy. 522 adamnan turatyn barlyq qyzymetkerler (126 ýákiletti, 50 nusqaýshy-baqylaýshy, 346 ıntervıýer) tájirıbelik oqý-jattyǵýdan jáne odan keıin Statıstıka departamentiniń bazasynda testileýden ótken.
Intervıýer retinde basqa qyzmet túrlerinen bosatylǵan barlyq nıet bildirýshiler erikti negizde qabyldanǵan.
«Qazirgi ýaqytta barlyq sanaq qyzmetkerleri tolyqtaı orynjaımen, kompıýtermen, jıhazben qamtylǵan. Kompıýterler Memlekettik organdardyń biryńǵaı kólik ortalyǵyna (MO BKO) qosylǵan. Árbir qyzmetker jeke qorǵanys quraldarymen qamtylǵan. Qalalyq qoǵamdyq kólikte tegin júrý máselesi sheshilgen. Árbir nusqaýshylyq ýchaskege ýchaskelik polıtsııa ınspektory bekitildi», - delingen vedomstvo habarlamasynda.
Aldyn ala málimetter boıynsha Túrkistan oblysynda ıntervıýerler 370 423 túrǵyn jáne adamdar turýy múmkin turǵyn emes orynjaılardy aralaýǵa mindetti.
2021 jyldyń Ulttyq sanaǵynyń negizgi kezeńi 1 qyrkúıek pen 30 qazan aralyǵynda júredi. Oǵan onlaın rejıminde de, dástúrli tásilmen de qatysýǵa bolady.
