Ulttyq sanaq: Maýsymda Qazaqstannyń barlyq aýmaǵynda daıyndyq kezeńi júrgiziledi

NUR-SULTAN. QazAqparat - 2021 jylǵy Ulttyq sanaǵynyń aldynda maýsym aıynda Qazaqstannyń barlyq eldi mekenderinde daıyndyq kezeńi júrgiziledi. Bul týraly QazAqparat Ulttyq statıstıka bıýrosyna silteme jasap habarlaıdy.

1-30 maýsym aralyǵynda ıntervıýerler (tirkeýshiler) árbir eldi meken boıynsha turǵyn jaılar, turǵyn úıler (turǵyn jaı ǵımarattary) jáne turǵyn úı retinde paıdalanylatyn turǵyn emes oryndardyń barlyǵyn aralap, olardyń tizimin jáne turaqty turatyn turǵyndardyń sanyn naqtylaıtyn bolady.

Mundaı tizimder qalalyq jáne aýyldyq eldi mekenderdiń aýmaqtaryn nusqaýshylyq jáne esep ýchaskelerine durys bólý jáne turǵyn sanyn ekinshi kezeń sanaǵyna, ıaǵnı aýdandastyrý úshin sanaq qyzmetkerine júkteme kólemine sáıkes birkelki bólý úshin qajet. Sondaı- aq, bul sanaq kezinde turǵyndar esebin tolyqtaı qamtýǵa múmkindik beredi.

Qazirgi ýaqytta ýaqytsha sanaq qyzmetkerlerin tartý jáne oqytý jónindegi jumystar aıaqtalýda, munda 1 kezeń ıntervıýerleri men 1 kezeń nusqaýshy-ıntervıýerleri tartylatyn bolady. 1-kezeń úshin barlyǵy 5 405 ıntervıýer jáne 773 nusqaýshy- baqylaýshy alynady.

Nysandardy aralaý kezinde ıntervıýerler ózderin tanystyryp, tegin aıtýlary jáne sanaq ıntervıýeriniń kýáligin kórsetýi kerek; óziniń kelýiniń maqsatyn naqty jáne qysqasha túsindirip, sol úı-jaıda turaqty (ádette) turatyndardyń meken-jaılaryn jáne sanyn suraýy qajet.

2021 jyldyń ulttyq sanaǵynyń negizgi kezeńi 1 qyrkúıekten 30 qazanǵa deıingi aralyqta ótedi. Oǵan onlaın rejıminde de, sondaı-aq dástúrli tásilmen de qatysýǵa bolady.