Ulttyq sanaq: Qazaqstandyqtarǵa qandaı suraqtar qoıylady

NUR-SULTAN. QazAqparat – Bıylǵy 1 qyrkúıekte bastalatyn ulttyq sanaq Qazaqstan azamattaryna barlyǵy 87 suraq qoıylady, dep habarlaıdy QazAqparat.

QR Strategııalyq josparlaý jáne reformalar agenttigi Ulttyq statıstıka bıýrosynan málim etkendeı, sanaq paraqtaryndaǵy suraqtar sany aıtarlyqtaı ulǵaıtylǵan. Munda barlyǵy 67 suraq jáne oǵan qosymsha 20 naqtylaýshy suraq bar.

«Suraqtardyń aıasyn keńeıtýge Eýropalyq sanaqshylardyń 2020 jylǵy turǵyn úı qoryn jáne turǵyndar sanaǵyn júrgizý jónindegi usynystary men TMD Memleketaralyq statıstıkalyq komıtettiń ádistemelik materıaldary negiz boldy.

Saýalnama 73 suraq aıasynda júrgizilgen 2009 jyldyń ulttyq sanaǵynan ereksheligi, 2021 jyldyń sanaǵynda kóshi-qon, eńbekpen qamtý, neke jaǵdaıy, bala týý jáne til bilýi boıynsha suraqtar aıasy keńeıtildi. Sondaı-aq, BUU-nyń múgedektik statıstıkasy jónindegi Vashıngton tobymen usynylǵan jańa suraqtar qosyldy, munda múgedektik krıterıılerin eskerip, densaýlyq saqtaý statıstıkasy aıasynda halyqaralyq yntymaqtastyqty keńeıtýge yqpal etý kózdelgen», - dedi Ulttyq statıstıka bıýrosynan.

Buǵan deıin habarlaǵanymyzdaı, elimizde ulttyq sanaq 2021 jyldyń 1 qyrkúıegi - 30 qazany aralyǵynda ótedi. 1 qyrkúıekte sanaq.gov.kz arnaıy saıty iske qosylady.