Ulttyq sanaq: Astanada 1,5 myń ıntervıýer úılerdi aralaýda
Úılerdi jappaı aralaý osy jyldyń 30 qazanyna deıin jalǵasady. Intervıýerler belgilengen merzimde sanaqtan onlaın ótpegen turǵyndardan saýalnama alatyn bolady. 1,5 myńǵa jýyq ıntervıýer-tirkeýshi úılerdi saǵat 09.00-den 21:00-ge deıin aralaıdy.
15 qazanǵa deıin sanaqtan onlaın ótken respondentter ekinshi ret qaıta jazylmaıdy. Olar ıntervıýerge sanaq ótkendigi týraly buryn alynǵan SMS-habarlamany nemese elektrondyq habarlamany kórsetýi tıis.
«Sanaq kezinde derekterdi jınaý úshin sáıkestendirý aqparaty retinde suraý salynǵan adamnyń JSN paıdalanylady. Bul derekterdiń qaıtalanýyna jol bermeıdi. Sondyqtan onlaın rejımde sanaqtan ótpegen respondentter ıntervıýerlerge ózderiniń JSN, sondaı-aq birge turatyn adamdardyń JSN usynýy jáne sanaq paraqtarynyń suraqtaryna jaýap berýi qajet.
Úı-úıdi aralaý kezinde barlyq qaıta jazylǵan respondentterge ıntervıýerler sanaqtan ótkeni týraly anyqtamalar beredi, olardy osy is-shara aıaqtalǵanǵa deıin saqtaý qajet. Budan basqa, halyqtyń qamtylýyn jáne derekterdiń durystyǵyn tekserý maqsatynda 2021 jylǵy 1-7 qarasha aralyǵynda respondentterdiń 10% qorytyndy tekseris júrgiziledi», - delingen ákimdik saıtynda.
Halyq sanaǵynyń negizgi kezeńindegi ıntervıýerdiń syrtqy kelbeti:
- fotosýreti bar beıdj, onda onyń tegi, aty, ákesiniń aty, berilgen kúni jáne qoldanylý merzimi, aýmaqtyq statıstıka bólimshesi basshysynyń móri men qoly kórsetiledi;
- logotıpi bar kók sharf;
- logotıpi bar kók tústi portfel;
- elektrondyq sanaq paraqtary bar planshet bolady.
Sanıtarlyq-epıdemıologııalyq talaptardy saqtaý maqsatynda ıntervıýerler barlyq qajetti jeke qorǵaný quraldarymen (maskalar, antıseptıkteri bar sanıtaızerler) qamtamasyz etilgen.
Eske salaıyq, Ulttyq sanaqta 91 suraq qamtylǵan. Suraqtar boıynsha 1446 biryńǵaı call-ortalyǵyna habarlasýǵa bolady.
