Ulttyq rýhtyń birtutastyǵy, ornyqtylyǵy jáne halyqtyń bolashaqqa degen senimi Astanada qalyptasady dep senemiz - fılosof Serik Nurmuratov
ALMATY. 9 shilde. QazAqparat - Kez kelgen eldiń astanasy búgingi tańda ózge qalalarǵa ónerkásiptiń shoǵyrlanýymen emes, kóbinese rýhanı-áleýmettik jaǵymen úlgi bolýy kerek. Bul másele fılosofııa ǵylymdarynyń doktory, professor Serik Nurmuratovtyń aıtýynsha, QR Prezıdentiniń «Astana - Qazaqstannyń uly dáýiri jáne strategııalyq vektory» atty maqalasynda jan-jaqty kórinis taýyp otyr.
«Bul maqalanyń basty ereksheligi Astana qalasynyń 15 jylda jasaǵan qadamdary tek qana ekonomıka salasyna ǵana emes, qoǵamnyń barlyq salasyna ortaq ekenin jáne onyń eldiń rýhanı ortalyǵyna aınalǵanyn kórsetkeninde. Jalpy memlekettiń ordasy eń aldymen adamı kapıtaldy damytý jaǵynan úlgi bolý kerek. Osy mıssııany Astana laıyqty túrde oryndaýda dep esepteımin. Óıtkeni qazir ol ǵylym jáne bilimmen qatar ónerdiń de ordasyna aınalýda», - deıdi Serik Esentaıuly. Ǵalymnyń paıymdaýynsha, qazirgi tańda el halqynyń jartysynan kóbin qazaqtar qurap otyr. Jastardyń 70 paıyzy qazaq tildi. Sondyqtan memlekettik tildi júzege asyrýda Astana ózgelerge úlgi kórsetýge tıisti. Oǵan qazir oń qadamdar jasalyp jatyr. Osyndaı dárejege jetip jatsa, Astana qazaqtyń rýhyn, ulttyń rýhyn kóteretin qalaǵa aınalady. Onyń birneshe sebebi bar. Birinshi, Astana jaı ǵana sheneýnikterdiń qalasy emes, rýhanı baǵytta júrgen Qazaqstan zııalylarynyń ortalyǵyna aınalyp kele jatyr. Bul qýanyshty jaǵdaı. Ekinshi, Astana shıkizattyq qýat kózderine arqa súıeıtin elderdiń qatarynan balama energetıka kózderin izdeýshige betburýda. Osy áreketimen jańa órkenıetti elderdiń qataryna qosylýǵa umtylýda. Bul quptarlyq is. Endi «Jasyl ólke», «Jasyl qala» bastamalaryn basqa qalalar da ilip alyp ketý kerek.
