«Ulttyq rýhty áskerı sımvolǵa qalaı syıǵyzamyz?!» - respýblıkalyq basylymdarǵa sholý
ASTANA. Mamyrdyń 7-si. /QazAqparat/ - Qazaq aqparat agenttigi respýblıkalyq basylymdarda mamyrdyń 7-si, juma kúni shyqqan ózekti materıaldarǵa sholýdy usynady.
***
Keshe Memleket basshysy - Qarýly Kúshterdiń Joǵarǵy Bas qolbasshysy Nursultan Nazarbaev keshe Otan qorǵaýshylar kúni men Uly Jeńistiń 65 jyldyǵy qarsańynda Qaraótkel kentindegi áskerı qalashyq pen astanalyq №44813 áskerı bólimde boldy. Osyǵan oraı «Egemen Qazaqstan» gazetiniń juma kúngi sanynda «Otan qorǵaý otbasynan bastalady» degen taqyryppen maqala basyldy. Basylymnyń jazýynsha, aldymen Elbasy áskerı qalashyqtyń jobasymen tanysyp, áskerı qyzmetshiler otbasylarynyń ornalasýyn surap bilgen. Sodan keıin áskerı qyzmetshilerge turǵyn úılerdiń kiltterin saltanatty jaǵdaıda tabys eken. «Budan keıin Memleket basshysy - Qarýly Kúshterdiń Joǵarǵy Bas qolbasshysy Nursultan Nazarbaev, joǵaryda atap kórsetilgenindeı, elordanyń áýe qorǵanysyn qamtamasyz etetin №44813 áskerı bólimine atbasyn burdy», dep jazady basylym. Onda Elbasy birinshi kezekte atalǵan áskerı bólimniń jaýyngerlik daıyndyǵynyń deńgeıimen jan-jaqty tanysqan.
Memleket basshysynyń atalǵan jerlerge sapary jaıynda «Aıqyn», «Alash aınasy», «Ekspress-K», «Lıter», «Izvestııa-Kazahstan» gazetterinde de keńinen jazylǵan.
«Keshe Premer-Mınıstr Kárim Másimov Grýzııa Syrtqy ister mınıstri Grıgol Vashadzemen kezdesti», dep jazady «Egemen Qazaqstan» gazeti QR Úkimet basshysynyń baspasóz qyzmetine silteme jasap. Kezdesý barysynda eki jaqty saýda-ekonomıkalyq qatynastardyń aldaǵy damý máseleleri, sonyń ishinde - qazaqstandyq ınvestıtsııanyń Grýzııa ekonomıkasynyń ár túrli salalaryna tartylýy men kólik, energetıka jáne ınfraqurylymnyń damýyndaǵy yqpaldastyqtyń keńeıýi máseleleri talqylandy.
«Egemen Qazaqstan» gazetiniń búgingi nómirinde QR Prezıdentiniń joǵary áskerı jáne arnaýly ataqtar, synyptyq shender berý týraly Jarlyǵy jaryq kórdi. Jarlyqqa sáıkes elimizdiń birqatar azamattary general-polkovnık, general-leıtenant, general-maıor áskerı ataqtaryn, avıatsııa general-leıtenanty, avıatsııa general-maıory, polıtsııa general-maıory arnaýly ataqtaryn jáne 1-shi synypty memlekettik ádilet keńesshisi shenin aldy.
***
«Alash aınasy» gazetiniń búgingi nómiri tolyǵymen Otan qorǵaýshy kúnine arnalǵan. Máselen «Ulttyq rýhty áskerı sımvolǵa qalaı syıǵyzamyz?!» degen taqyryppen jarııalanǵan maqalada tarıhta ımperııa bolǵan memleketter áskerin tarıhı rámizdermen, áıgili qolbasshylarynyń dańqty dástúrimen, tipti dinbasylarynyń jolymen qanattandyryp, rýhyn janyp otyratyndyǵyn, kózsiz batyrlyǵy úshin beriletin joǵary nagradalar, orden-medaldar, áskerı oqý oryndary bahadúrleriniń esimimen atalatyndyǵyn alǵa tartyp, al bizde birde-bir orden-medal tý baılap, jaýǵa shapqan aqberen batyrlardyń esimimen atalmaıtyndyǵyna qynjylys bildiredi. «Nege bizde de aty ańyzǵa aınalǵan Janaı batyr, Qarasaı batyr, Qarakereı Qabanbaı, Qanjyǵaly Bógenbaı, Shapyrashty Naýryzbaı, Aǵyntaı, Sańyryq, Taılaq, Ótegen, Suranshy, Seńkibaı men Shoıbek, Malaısary, Raıymbek, Jánibek, Malaısary, Baıan, Syrym, Isataı, Mahambet, Baýyrjan Momyshuly atyndaǵy áskerı nagradalar taǵaıyndamasqa? Dushpanmen urysqa atoılap kirgen Kereı, Jánibek, Qasym, Haqnazar, Táýekel, Táýke, Abylaı, Ábilqaıyr, Kenesary handardyń esimin áskerı ataqtarǵa, áskerı oqý oryndaryna nege enshilemeske?», dep jazady basylym.
«7 mamyr - Otan qorǵaýshylar kúnin memlekettik merekege aınaldyrý kerek pe?». «Alash aınasy» gazetiniń «Oı-kókpar» aıdarynyń búgingi osylaı qoıylypty. «Qazaqstan Respýblıkasyndaǵy merekeler týraly» Zańnyń 1-babyna sáıkes elimizde merekeler ulttyq, memlekettik jáne kásibı merekeler bolyp bólinedi. Ulttyq merekeler elimizdiń damýyna eleýli yqpal etken, erekshe tarıhı mańyzy bar oqıǵalardyń qurmetine belgilense, memlekettik merekeler qoǵamdyq-saıası mańyzy bar oqıǵalarǵa arnalǵan. Al kásibı merekelerge ulttyq jáne memlekettik merekeler mártebesi berilmese de, azamattardyń jekelegen sanattary atap ótedi. Sondaı-aq ulttyq jáne memlekettik merekelerde arnaıy merekelik demalys jarııalanady. Sonyń ishinde 8 Naýryz - halyqaralyq áıelder kúni memlekettik mereke retinde toılansa, er-azamattar merekesi sanalatyn 7 mamyr - Otan qorǵaýshylar kúni kásibı mereke dárejesinde ǵana», dep jazǵan basylymnyń joǵarydaǵy saýalyna bergen mamandardyń jaýabyn oqyǵyńyz kelse, basylymǵa nazar aýdaryńyz.
«Qazaqstan Úkimeti men Qorǵanys mınıstrligine qarasty Qarýly Kúshterdiń basshylyǵy ásker qataryndaǵy sarbazdardyń materıaldyq-tehnıkalyq jaǵdaıyn árqashan jiti nazarda ustaýda», dep jazady «Alash aınasy» gazeti «Jaýyngerler halal as ishedi» degen taqyryppen berilgen maqalasynda. Jalpy ásker azyǵynyń qunarlylyǵy 4011 kkaldan 4351 kkalǵa jetken. Aıta keterligi, bizdiń sarbazdardyń azyq qunarlylyǵy Reseı áskerlerine qaraǵanda, belgili mólsherde joǵary tur. Bul baǵytta ulttyq taǵam erekshelikteri de eskerilgen. Qarýly Kúsh sarbazdarynyń deni musylman bolǵandyqtan, belgilengen tamaq normasy qatarynan shoshqa eti múlde alynyp tastalǵan. ıAǵnı qazaq sarbazy halal tamaqpen azyqtanady.
***
«Aıqyn» gazetiniń dástúrli «Aq sóıle!» aıdarynyń búgingi qonaǵy - qyrǵyz saıasatkeri Bermet Aqaevamen aradaǵy suhbat «Qyrǵyzstanda ońtústik pen soltústikke bóliný - halyqqa emes, saıası elıtaǵa ǵana tán nárse» degen taqyryppen berilgen. Basylymnyń san túrli saýaldaryna tuşymdy jaýap bergen qyrǵyz saıasatkeri Qyrǵyzstandaǵy sońǵy oqıǵalardyń túpki sebebi ne degen saýalǵa «El aldymen, menińshe sáýir oqıǵalarynyń basty sebebi - respýblıkanyń qıyn áleýmettik-ekonomıkalyq jaǵdaıǵa dýshar bolǵany. Sońǵy birneshe jylda halyqtyń ál-aýqaty syn kótermeıtindeı jaǵdaıǵa tústi. Al bıylǵy jyldyń qańtar aıynan bastap jaǵdaı tipti ýshyǵyp ketti. Sebebi jańa tarıfter qoıylyp, baǵa kóterildi», dep jaýap beripti. Ekeýara áńgimeniń tolyq nusqasyn gazettiń juma kúngi sanynan egjeı-tegjeıli oqı alasyzdar.
«Ońtústik Qazaqstan oblysynyń ákimi Asqar Myrzahmetov Keńes Odaǵynyń Batyry Toǵanbaı Qaýynbaev pen «Dańq» ordeniniń tolyq ıegeri Qarabaı Qaltaevqa Shymkent qalasynyń ortalyǵynan keń de jaryq páter syılady», dep jazady «Aıqyn» gazeti. Eki batyrdyń jańa páterlerine qutty bolsyn aıta kelgen ákim qazaqtyń ejelden beri kele jatqan jolyn saqtap , batyrlardyń otbasyna syıymdylyǵy mol tońazytqysh pen eń sońǵy úlgidegi teledıdar tartý etken.
***
«Ekonomıkalyq damý jáne saýda mınıstrligi Kedendik odaq máseleleri boıynsha konsýltatıvtik keńestiń qurylǵany týraly jarııa etti», dep jazady «Ekspress-K» gazeti.
Atalǵan jaıt tóńiregindegi maǵlumattardy basylymnyń búgingi nómirinde jarııalanǵan maqaladan oqı alasyzdar.
