Ulttyq rýhanı jańǵyrý: Mádenıet mınıstrligi qandaı jumystar atqarady

NUR-SULTAN. QazAqparat – QR Mádenıet jáne sport vıtse-mınıstri Nurǵısa Dáýeshov «Ulttyq rýhanı jańǵyrý» ulttyq jobasy aıasynda mádenıet salasynda atqarylatyn jumystardy aıtty, dep habarlaıdy QazAqparat tilshisi.

Ulttyq jobany iske asyrý úshin úsh birdeı mınıstrliktiń kúshi jumyldyrylady, ıaǵnı Aqparat jáne qoǵamdyq damý mınıstrligi, Mádenıet jáne sport mınıstrligi, Bilim jáne ǵylym mınıstrligi qamtylady.

Ulttyq jobanyń mádenıet salasy bóliginde kelesi baǵyttardy qamtıdy:

- «Rýhanı jańǵyrý» qundylyqtaryn ilgeriletý jáne memlekettik tildi damytý;

- «El rýhy» jobasy.

Onyń aıtýynsha, atalǵan baǵyttar aıasynda kelesi mindetter alǵa qoıyldy - mektep jasyndaǵy balalardy mádenı tárbıemen qamtý, «Oqıtyn ult» jobasy aıasynda halyqtyń kitap oqý belsendiligin arttyrý, mádenıet salasynda kórsetiletin qyzmetterdiń qoljetimdiligi men sapasyn arttyrý jáne otandyq mádenı ónimdi tanymal etý.

Vıtse-mınıstrdiń sózine qaraǵanda, «Oqıtyn ult» jobasy aıasynda halyqtyń kitap oqý belsendiligin arttyrý atty kórsetkishke sáıkes, mınıstrlik 5 is-sharany júrgizýdi kózdedi.

Bul sharalar turǵyndardyń, sonyń ishinde balalar men jasóspirimderdiń oqý saýattylyǵyn arttyrý men kitap oqý mádenıetin damytýǵa, otandyq qalamgerlerdi, sonyń ishinde jas aqyn-jazýshylardy memleket tarapynan yntalandyrý men qoldaýǵa baǵyttalǵan.

Atap aıtqanda, mınıstrliktiń qoldaýymen 2007 jyldan beri turaqty túrde jyl saıyn ótkizilip kele jatqan «Bir el - bir kitap» oqý aktsııasy endigi jerde jańa formatta usynylady.

Sonymen qatar, búgingi tańda kitaphananyń oqyrmandarǵa usynatyn onlaın qyzmetin jetildirý máselesi ózekti. Osyǵan oraı mınıstrlik Qazaqstan ulttyq elektrondy kitaphanasynyń qyzmetin jetildirý, modıfıkatsııalaý jáne oqyrmandar úshin mobıldi qosymshalar arqyly elektrondy kitaphanany qoljetimdi etý jumystaryn júrgizedi.

Budan bólek, óńirlerdegi kópshilikke arnalǵan kitaphanalar «Ádebı ólketaný» jobasyn uıymdastyrýdy josparlap otyr.

Osy rette joba aıasynda árbir óńirge tıesili ádebıeti men aqyn-jazýshylarynyń shyǵarmashylyǵyn ózge óńirlerdegi oqyrmandarǵa tanystyrý jáne nasıhattaý sharalaryna basymdyq beriledi.

Munymen qosa, mınıstrlik otandyq qalamgerlerdi yntalandyrý maqsatynda 2022 jyldan bastap «Úzdik balalar shyǵarmasy», «Jyldyń úzdik kitaby» baıqaýyn uıymdastyrady.

Sondaı-aq, otandyq jas qalamgerlerge memlekettik qoldaý kórsetý, jańa esimderdi ulyqtaý maqsatynda jas aqyn-jazýshylarǵa Prezıdenttiń arnaıy «Aıboz» ádebı syılyǵy taǵaıyndalady.