Ulttyq prokatka qazaqstandyq bank qyzmetkeri jaıly fılm shyqqaly jatyr
ASTANA. QazAqparat - Sh.Aımanov atyndaǵy «Qazaqfılm» kınostýdııasy ústimizdegi jyly 22 qarashadan bastap ulttyq prokatqa shyǵatyn «Jetilýdiń jeke trenıngi» fılminiń treılerin jarııa etti, dep habarlaıdy QazAqparat tilshisi.
«Qazaqfılm» kınostýdııasynyń baspasóz qyzmetinen habarlanǵandaı, kartınanyń rejısseri «Qyzǵylt qoıan týraly hıkaıa», «Inoplanetıandardyń qatysy joq» fılmderimen tanylǵan - Farhat Sháripov. QR Mádenıet jáne sport mınıstrliginiń tapsyrysy boıynsha túsirilgen fılm jasy qyryqqa kelgen, orta jas kúızelisin bastan keshirip júrgen bank qyzmetkeri Qanat týraly baıandaıdy. Birde Qanat tulǵalyq qalyptasý - kóshbasshylyq qasıetterdi damytý trenıngine barady. Koých-trener jetistikke qalaı jetý kerektigin jáne kóshbasshy bola bilýdiń ádisterin aıtady. Kóshbasshy bolýdyń qupııalaryn boıyna sińire kele, Qanat ózin jáne ómirge degen kózqarasyn ózgertýge bekinedi.
Fılmniń túsirý jumystary Almatyda júrgizilgen. Kartınanyń basty rólin somdaýǵa kóptegen úmitkerlerdiń arasynan Dýlyǵa Aqmolda bekitilgen bolatyn. Sonymen qatar, fılmde Erjan Túsipov, Gúljamal Qazaqbaeva, Ásel Qalıeva, Fılıpp Voloshın jáne basqa da akterler túsken.
Aıta keterligi, atalǵan kınotýyndy 23-shi Halyqaralyq Pýsan kınofestıvaliniń «Azııa kınosyna nazar salý» baǵdarlamasyna qatysqan bolatyn.
Fılmniń treılerin «Qazaqfılmniń» YouTube jelisindegi resmı arnasynan kórip tamashalaı alasyzdar.
