Ulttyq parkterdiń barlyǵy jyl sońyna deıin damý tujyrymdamasyn bekitedi

NUR-SULTAN. QazAqparat – Jyl aıaǵyna deıin eldegi ulttyq tabıǵı parkterdiń barlyǵy damý tujyrymdamasyn bekitedi. QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıteti tóraǵasynyń orynbasary Danııar Turǵanbaev ortalyq kommýnıkatsııalar qyzmetinde ótken brıfıngide osyndaı málimet aıtty, dep habarlaıdy QazAqparat tilshisi.

«Qazirgi ýaqytta biz ár ulttyq parktiń tujyrymdamasyn ázirlep, bekitip jatyrmyz. Birinshi kezekte damyǵan elderdiń ulttyq parkterindegi tájirıbeler men úlgilerdi alyp, bizge engizý kózdelip otyr. Almaty oblysynyń taýly klasterindegi 5 ulttyq parktiń tujyrymdamasy ázirlenip, bekitildi. Ol óz nátıjesin berip jatyr. Baqylaý, ótkizý tospalaryn avtomattandyrý, onlaın tólemder jasaý, sapar ortalyqtaryn salý jáne soqpaqtardy abattandyrý jumystary jolǵa qoıylǵan», - degen komıtet tóraǵasynyń orynbasary Almaty oblysynda tujyrymdamanyń alǵashqy nátıjeleri belgili ekenin atady.

«Qazir Almaty oblysynda tujyrymdamalar iske asyryla bastady. Іle Alataý parkinde tujyrymdama 40-45 paıyzǵa iske asyryldy. Al Kólsaı men Sharyn ulttyq parkterinde jumystar bıyl bastaldy. Qansha paıyz ekenin eseptegen joqpyz, biraq qazirdiń ózinde saıahatshylar abattandyrý nátıjelerin kóre alady.

Basqa ulttyq parkter boıynsha tujyrymdamalar túgel ázirlenip jatyr. Baıanaýyl, Kókshetaý, Buırataý ulttyq parkteri boıynsha bekitildi. Olar 2022 jyldan bastap iske asyryla bastaıdy. Jyl aıaǵyna deıin eldegi 12 ulttyq park boıynsha tujyrymdama ázirlep, bekitý josparlanǵan», - dedi Danııar Turǵanbaev.