Ulttyq parkterdi lastaǵandarǵa salynatyn aıyppul kólemi ulǵaıady
Májiliste Qazaqstannyń Qylmystyq, Qylmystyq-protsestik jáne Ákimshilik quqyq buzýshylyq týraly kodeksterine ekologııalyq quqyq buzýshylyqtar úshin jaýaptylyqty kúsheıtýdi kózdeıtin ózgerister men tolyqtyrýlar engizý týraly Zań jobalary birinshi oqylymda qaralyp jatyr.
Qujattardy Ekologııa, geologııa jáne tabıǵı resýrstar mınıstri Serikqalı Brekeshev tanystyrýda.
«Qazaqstannyń ulttyq parkteri men basqa da tabıǵı baılyqtaryn qorǵaý maqsatynda zań jobalarymen ekologııalyq zalal keltirgeni úshin jaýapkershilikti kúsheıtý bóliginde ózgerister men tolyqtyrýlar engizý kózdeledi», - degen mınıstr áýeli Ákimshilik quqyq buzýshylyq týraly kodeksine usynylyp otyrǵan ózgeristerge toqtaldy.
Onyń aıtýynsha, jyl saıyn súrek daıyndap áketý sharalarynan keıin orman paıdalanýshylardyń órt qaýipsizdigi men sanıtarııalyq qaǵıdalardy saqtamaýy sebebinen orman alqaptarynda órt pen zııankesterdi oshaqtary paıda bolyp jatyr.
«Qazaqstan orman az el bolǵandyqtan orman paıdalanýshylardyń jaýapkershiligin kúsheıtý qajet. Zańda Ákimshilik kodekstiń 368-babynyń 2-bóliginde «Kespe aǵash qoryn paıdalanýdyń, súrek daıyndaý men áketýdiń, shaıyr men aǵash shyryndaryn, qosalqy orman materıaldaryn alýdyń belgilengen tártibin buzý» erekshe qorǵalatyn tabıǵı aýmaqta jasalǵan is-áreketter úshin aıyppul somasy ulǵaıtylady», -dedi vedomstvo basshysy.
Sondaı-aq, ol ulttyq parkterdi qatty turmystyq qaldyqtarmen lastaýdyń ózekti problemaǵa aınalǵanyn atap ótti.
«Orman faýnasyn joıý nemese búldirý, sondaı-aq ormandy qaldyqtarmen, hımııalyq zattarmen búldirý, lastaý jáne orman qory jerlerine ózge de zalal keltirgeni úshin aıyppuldar mólsheri ulǵaıtylady», - dedi Seriqalı Brekeshev. Atalǵan norma Ákimshilik kodekstiń 372-baptyń 4-bóligine enip otyr.
Buǵan deıin atalmysh vedomstvo Ulttyq parkterde 685 shaqyrymdyq týrıstik marshrýt jasalǵanyn habarlaǵan bolatyn.
