Ulttyq parkterdegi zańbuzýshylyqtar boıynsha jedel jeli iske qosyldy
ALMATY. QazAqparat – Qazaqstanda Ulttyq parkterdegi zańbuzýshylyqtar týraly jedel jeli iske qosyldy, dep habarlaıdy QazAqparat tilshisi.
Endi kez kelgen azamat ulttyq parktegi jaǵymsyz áreketter, onyń ishinde, aǵashty zańsyz kesý, zańsyz balyq, ań aýlaý, eko-beketterde túbirtek berýden bas tartý, park qyzmetkeriniń jumysyndaǵy olqylyq jáne basqa da zańbuzýshylyqtar týraly foto jáne beıne aqparat berý arqyly tikeleı habarlaı alady.
«Qazirdiń ózinde bizge ulttyq park jumysyna shaǵymdanyp, eskertý aıtyp jatqandar bar. Árbir qońyraý boıynsha tekseris júrgizilip, kemshilik túzetiledi. Máselen, bir habarlama boıynsha jedel shara qabyldanyp, zańbuzýshylyq joıyldy. Ulttyq parkterdegi jaǵdaıdy birge ózgerteıik. Tek birikkende ozyq nátıjelerge qol jetkize alamyz!», - dedi QR Ekologııa, geologııa jáne tabıǵı resýrstar mınıstri Maǵzum Myrzaǵalıev.
QR EGTRM Orman sharýashylyǵy jáne janýarlar dúnıesi komıteti jedel jelisiniń nómiri: +7777 6785252.
Jedel jeli vatsabyna joldanǵan habarlamada shaǵym aıtýshynyń aty-jóni, sondaı-aq, zańbuzýshylyq kórinisiniń sýreti nemese beınetúsirilimi, ulttyq parktiń ataýy jáne ornalasqan jeri shamamen kórsetiledi.
Osylaısha, eldiń árbir turǵyny elimizdiń tabıǵatyn qorǵaýǵa jáne ony saqtaýǵa qatysyp, turǵyndar arasynda joǵary deńgeıdegi týrıstik mádenıetti qalyptastyrýǵa yqpal ete alady.
Eske salsaq, budan buryn QR Prezıdenti Qasym-Jomart Toqaev azamattardyń tabıǵı demalys oryndaryndaǵy jappaı mádenıetsizdigi problemasyn kótergen bolatyn. Ótken demalystan bastap, Ekologııa mınıstrligi QR ІІM qyzmetkerlerimen, qoǵam belsendilerimen birlesip, adamdar demalatyn tabıǵı jáne erekshe qorǵalatyn aýmaqtarda reıd ótkizile bastady. Zańbuzýshylyq oryn alǵan jaǵdaıda túsindirý jumysy júrgizilip, aıyppul salynady. Bul baǵyttaǵy júıeli jumys jalǵasyp jatyr.
Budan buryn mınıstrlik ulttyq parkterde «shashlyk týrızmi» bolmaıtynyn atap ótken. Ulttyq parkterge kelýshilerdi mınıstrlik ekotýrızmdi damytý, onyń ishinde aıaqjoldar men qajetti ınfraqurylym salý arqyly tartpaq.
Mınıstrlik qaramaǵyndaǵy memlekettik ulttyq tabıǵı parkter tizimi:
1. Іle-Alataý MUTP
2. «Kólsaı kólderi» MUTP
3. Sharyn MUTP
4. «Altyn-Emel» MUTP
5. «Kókshetaý» MUTP
6. Baıanaýyl MUTP
7. Qaton-Qaraǵaı MUTP
8. Saıram-Ógem MUTP
9. «Buırataý» MUTP
10. Qarqaraly MUTP
11. Jońǵar-Alataýy MUTP
