Ulttyq Paralımpıada Komıteti 4 jyldyq nátıjelerin qorytyndylady
NUR-SULTAN. QazAqparat - 2019 jylǵy 28 qarashada QR Ulttyq Paralımpıadalyq Komıteti Konferentsııa otyrysynda 4 jyl ishinde atqarǵan jumystaryn qorytyndylady, dep habarlaıdy QazAqparat.
QR UPK Prezıdenti Qaırat Boranbaev elimizdegi paralımpıadalyq qozǵalys sport federatsııalarynyń qoldaýymen durys baǵytta damyp kele jatqanyn aıtty.
«Osy kúnge deıin jaqsy nátıjelerge qol jetkizdik. Halyqaralyq paralımpıada komıtetimen turaqty jumys jasalyp jatyr, ári múmkindigi shekteýli jandardyń da senimine kirdik. Sonymen qatar atalmysh kezeńde demeýshilerdiń kómegimen sportshylarymyz jattyǵatyn Paralımpıadalyq jattyǵý ortalyǵy jáne «Tarlan» muzaıdyny ashyldy. Úkimet tarapynan da jaqsy qoldaý bar, sonyń arqasynda biz zańnamalyq deńgeıde oń ózgeristerge qol jetkizýdemiz. Úkimet múshelerimen, depýtattarmen birlesip paralımpıadashylarǵa qatysty zań jobasyna ózgertýler daıyndadyq. Jaqynda olar qabyldanady degen úmittemiz», - dedi UPK Prezıdenti Qaırat Boranbaev.
UPK atqarýshy dırektory Erlan Súleımenov Ulttyq paralımpıadalyq quramanyń jaǵdaıy, sporttyq nátıjelermen Qazaqstanda ótken iri halyqaralyq týrnırler týraly baıandady.
«Búgingi bizdiń negizgi mindetimiz - aldaǵy 2020 jyly Tokıoda (Japonııa) ótetin jazǵy Paralımpıada oıyndaryna daıyndalý. Bizdiń atletterimiz parasporttyń 11 túrinen: para jeńil atletıka, para júzý, para dzıýdo, para paýerlıftıng, para taekvondo, voleıboldy otyryp oınaý, para sadaqpen oq atý, para nóldik atý, para ústel tennısi, para at sporty, para kanoedan qatysady dep josparlanyp otyr. Sondyqtan bizdiń sportshylarymyz kelesi jyldyń basynan bastap memlekettik tapsyrys aıasynda ulttyq qurama komandalardyń paralımpıadalyq sport túrlerinen daıarlaýdy bastaımyz. Bul - qurama komandalardyń nátıjelerine oń áser etetin jaýapty, mańyzdy fakt», - dedi Erlan Súleımenov.
Sonymen qatar otyrysta UPK Jarǵysyna ózgerister engizildi. Komıtettiń jumysyn nyǵaıtý úshin biz Berik Imashev pen Baqyt Saparov sııaqty tájirıbeli menedjerlerdi komandamyzǵa shaqyrdyq. Berik Imashev – Qazaqstan Respýblıkasy Ortalyq saılaý komıssııasynyń tóraǵasy, sonymen qatar Qazaqstan at sporty federatsııasynyń prezıdenti jáne QR Ulttyq Olımpıada Komıtetiniń múshesi.
Baqyt Saparov buǵan deıin «Nur Otan» partııasynyń elordalyq fılıaly tóraǵasynyń birinshi orynbasary qyzmetin atqarǵan. Konferentsııanyń biraýyzdy sheshimimen kandıdattar maquldandy. Sondaı-aq 2016 jyldan bastap UPK Bas hatshysy qyzmetin atqarǵan Dıas Súleımenov UPK-nyń halyqaralyq qatynastar jónindegi vıtse-prezıdenti bolyp saılandy. Bas hatshy laýazymyna Erlan Súleımenov taǵaıyndaldy (buǵan deıin atqarýshy dırektor).
Mádenıet jáne sport vıtse-mınıstri Eldos Ramazanov Ulttyq paralımpıada komıtetiniń basshylyǵyna atqarǵan jumys úshin alǵys bildirip, kelesi jyly jemisti nátıjelerge qol jetkizýdi tiledi. Sonymen qatar is-sharaǵa QR UOK Bas hatshysy Saken Musaıbekov, QR MSM Sport jáne dene shynyqtyrý isteri komıtetiniń tóraǵasy Serik Sápıev jáne barlyq respýblıkalyq sport federatsııalardyń basshylary qatysty.
