Ulttyq panteon qurylysynyń saraptamalyq quny ǵana belgili - Qarjy mınıstri
ASTANA. QazAqparat - Ulttyq panteon qurylysy qunynyń saraptamalyq baǵasy ǵana belgili. Bul týraly búgin Májiliste 2015 jylǵy respýblıkalyq bıýdjettiń atqarylýy týraly esep talqylanǵannan keıin jýrnalısterge bergen suhbatynda QR Qarjy mınıstri Baqyt Sultanov málim etti.
«Qazirgi tańda atalǵan máseleniń jobalyq-smetalyq qujattamasyn ázirleý júrip jatyr. Osyǵan qatysty áli de birdeńe aıtý erterek. Soǵan qaraǵanda, bul tek saraptamalyq baǵalaý ǵana, biz áli qujattamany qaraǵan emespiz», - dedi B. Sultanov. Onyń aıtýynsha, bul másele Astana qalalyq ákimdiginde talqylanǵan bolýy múmkin, alaıda mınıstrlikke panteon qurylysynyń quny kórsetilgen qujattar kelip túspegen.
Aıta ketsek, buǵan deıin birqatar BAQ Astana qalalyq ákimdigine silteme jasap, onda Ulttyq panteon qurylysynyń tehnıkalyq-ekonomıkalyq negizdemelik quny 79 mıllıard teńge quraıtyny týraly aqparattar aıtylǵan edi.
